Qatar astanasy Dohada ótip jatqan nysana kózdeýden Álem kýboginde otandasymyz Ásem Orynbaı barlyq qarsylasynan basym túsip, altynnan alqa taqty, dep habarlaıdy almaty-akshamy.kz.
Ulttyq qurama sportshysy stend atýdyń skıt baǵdarlamasynyń fınalynda 51 upaı jınap, tuǵyrdyń eń bıik satysyna kóterildi. Kúmis júldeni 50 upaı alǵan ıtalıalyq mergen Kára Dı Marsıantonıo ıelense, qola medal Danıa Djo Vıssıge (AQSH) buıyrdy. Taǵy bir aıta keterligi, dál osy baǵdarlamada baq synaǵan 3 dúrkin Olımpıada chempıony Kımberlı Roýd (AQSH) júldege bir taban jetpeı toqtady.
«Ásem Orynbaıdy Álem kýbogi jarysyndaǵy jeńisimen shyn júrekten quttyqtaımyn. Bıyl Ásem úshin óte tabysty maýsym boldy. Máselen, ol Qytaıdaǵy Azıa oıyndarynda eki altyn, bir qola medal jeńip alsa, mine arada kóp ýaqyt ótpeı Álem kýboginde qarsylas shaq keltirmedi. Bul – tamasha kórsetkish. Otandasymyz aldaǵy baıraqty básekelerde de jankúıerlerin qýantyp, úzdikter qatarynan kórinetinine senimdimin. Nysana kózdeýdegi bul jeńis osy sport túrimen aınalysatyn jastardy bıik belesterdi baǵyndyrýǵa yntalandyrady», - dedi Ermek Marjyqpaev.
Halyqaralyq nysana kózdeý federasıasy (ISSF) mundaı fınaldy araǵa 4 jyl salyp uıymdastyryp otyr. Básekede 42 elden kelgen 179 úzdik mergen baq synap jatyr. Qazaq mergeni qazir ISSF reıtıńinde 7-orynda kele jatyr.