Antısanıtarıa, as máziriniń durys qurylmaýy sekildi problemalar tamaqtyń ysyrap bolýyna ákelýde, dep habarlaıdy aqshamnews.kz.
Budan bylaı qazaqstandyq bilim berý uıymdarynda tamaqtandyrý sapasyna kúndelikti monıtorıń júrgiziletin boldy. Osy ózgeriske saı, 24.kz arnasy álem elderiniń mektep asqanalaryndaǵy as máziri, tártibi qandaı ekenin baqylap kóripti.
Fınlándıa mektepterindegi tamaqtaný úzdikterdiń biri sanalady. Jasyna saı balanyń energetıkalyq qajettiliginiń úshten birin qamtamasyz etedi. Ol boıynsha qanyqqan maılardyń úlesi 10%-ten aspaýy tıis. Bul Fınlándıanyń Ulttyq densaýlyq jáne ál-aýqat ınstıtýty ǵalymdarynyń usynymyna sáıkes keledi. As mázirine mindetti túrde et, kókónis, qara bıdaıdan pisirilgen nan, maısyz sút ne sý kiredi. Mundaı túski astyń quny shamamen 1 eýro. Biraq bul aqshaǵa jumysshylardyń eńbegi jáne logıstıkaǵa ketken shyǵyndar kirmeıdi. Logıstıka demekshi, elde shalǵaıdaǵy mektepterge azyq-túlik jetkizý boıynsha qıyndyqtar bar. Sosyn bilim berý mekemeleriniń asqanalarynda tamaqtyń 15%-i qoqysqa tastalyp, ysyrap bolyp jatady.
AQSH mektepterindegi as mázirine qatysty syn kóp
AQSH mektepterinde de tamaq artylyp, jylyna bir jarym mln tonnadan astam azyq-túlik qoqysqa tastalady. Sosyn mamandar amerıkalyq oqýshylardyń as mázirine qatysty kóp syn aıtyp jatady. Óıtkeni onda qaıta óńdelgen azyq-túlik, fast-fýd kóp te, kókónis pen jemis-jıdek az. Sodan balalar arasynda semizdik pen júrek-qan tamyrlary aýrýlary keńinen taraǵan.
Úndistandaǵy mektep asqanalarynyń tazalyǵy syn kótermeıdi
Úndistanda mekteptegi tamaqtanýdy jaqsartý boıynsha memlekettik baǵdarlama qarastyrylǵan. Biraq sonyń ózinde sarapshylar jergilikti balalardyń tolyqqandy tamaqtanbaıtynyn aıtady. Sosyn bilim berý mekemeleriniń tazalyǵy syn kótermeıdi. Óıtkeni azyq-túlik qaýipsizdigi talaptary durys saqtalmaıdy. Onyń ústine mamandar tapshylyǵy máselesi taǵy bar. 2013 jyly eldiń shyǵysyndaǵy Bıhar shtatynda mekteptegi tamaqtan balalar ýlanyp, 23 oqýshy qaıtys bolǵan