Densaýlyq saqtaý mınıstrligi ónimniń qaýipsizdigi men «sur sertıfıkattardy» baqylaýdy kúsheıtedi
Ónimniń qaýipsizdigin memlekettik baqylaý Densaýlyq saqtaý mınıstrliginiń basty strategıalyq mindetteriniń biri bolyp qala beredi. 2015 jyldan bastap Qazaqstanda biryńǵaı sanıtarlyq talaptarǵa jáne Eýrazıalyq ekonomıkalyq odaqtyń (EAEO) 22 tehnıkalyq reglamentine sáıkestigin tekserý maqsatynda sanıtarıalyq-epıdemıologıalyq saraptama júrgiziletin profılaktıkalyq baqylaý júıesi jumys isteıdi. Onyń ishinde 13 reglament tamaq ónimderine qatysty.
Úkimet otyrysynda Densaýlyq saqtaý mınıstri Aqmaral Álnazarova 2024 jyldyń tamyz aıynan bastap ónimniń qaýipsizdigin baqylaýdyń jańa tásilderi engizilgenin málimdedi. Baqylaý satyp alý jáne keıingi saraptama arqyly júzege asyrylady. Qazirgi tańda 5 myńnan astam ónim synamasy tekserildi, onyń 35%-y belgilengen standarttarǵa saı kelmegeni anyqtaldy. Bul rette jedel túrde 439 shara qabyldanyp, 2 tonnadan astam sapasyz ónim saýdadan alyndy.
Importtyq ónimderge baqylaýdy kúsheıtý maqsatynda Aýyl sharýashylyǵy mınıstrligimen birlese otyryp, 34 óndirýshige qatysty zerthanalyq tekserý jumystary júrgizildi.
Sanıtarıalyq-epıdemıologıalyq saraptamalar Ulttyq saraptama ortalyǵynyń 84 akkredıttelgen zerthanalarynda oryndalýda. Sonymen qatar, EAEO elderiniń shekaralaryndaǵy ótkizý pýnktterinde sanıtarıalyq-karantındik baqylaý kúsheıtildi. Osyǵan oraı, 2 myńǵa jýyq taýar partıasynyń ımporty tekserilip, 177 taýardyń elge ákelinýine tyıym salyndy.
«Sur sertıfıkattarǵa» qarsy kúres sheńberinde normatıvtik-quqyqtyq aktilerdi jetildirý boıynsha jumystar jalǵasýda. Bul shara zańsyz qujattardyń taralýyn boldyrmaýǵa baǵyttalǵan.
Mınıstrlik ónimniń qaýipsizdigin qamtamasyz etý boıynsha jumysty ári qaraı jalǵastyryp, tutynýshylardyń densaýlyǵyn qorǵaýǵa erekshe nazar aýdarady.