Tashkentte 1 mamyr alaýy tutanatyn bokstan álem birinshiliginde el namysyn qorǵaıtyn boksshylardyń tizimi jarıalandy, dep habarlaıdy Almaty-akshamy.kz QazAqparatqa silteme jasap.
QR Mádenıet jáne sport mınıstrligi Sportty damytý dıreksıasynyń baspasóz qyzmetinen málim etkendeı, qazir ulttyq qurama boksshylary Shymkent qalasyndaǵy «Alma-Taý» bazasynda sońǵy oqý-jattyǵý jıynyn ótkizip jatyr.
Ulttyq quramanyń bas bapkeri Myrzaǵalı Aıtjanov álem chempıonatynda tómendegi boksshylardan úmit kútip otyr.
Olar:
48 keli - Sanjar Táshkenbaı
51 keli - Sáken Bıbosynov
54 keli - Mahmud Sabyrhan
57 keli - Serik Temirjanov
60 keli - Talǵat Syrymbetov
63,5 keli - Sanatáli Tóltaev
67 keli - Dýlat Bekbaýov
71 keli - Aslanbek Shymbergenov
75 keli - Nurqanat Raıys
80 keli - Nurbek Oralbaı
86 keli - Saǵyndyq Toǵambaı
92 keli - Aıbek Oralbaı
+ 92 keli - Qamshybek Qonqabaev
«Álem chempıonatyna baratyn úmitkerlerdi biz uzaq ýaqyt ári tıanaqty iriktedik. Jyl basynan birneshe oqý-jattyǵý jıynyn ótkizdik, jigitterdi túrli jarystarǵa apardyq. Ár boksshyǵa qatysty saraptama jasadyq. Ssondyqtan árqaısysynyń shamasyn bilemiz. Álem chempıonatyna birinshi ret qatysatyn 3 bylǵary qolǵap sheberimiz bar. Olar jas bolsa da, tájirıbesi tolysqan, boks áleminde alar orny bar. Halyqaralyq arenada namysty qoldan bermeıdi degen senimdemin», - dedi Myrzaǵalı Aıtjanov.
«Bapkerlik quram boksshylardy álem chempıonatyna jaqsylap daıyndap apara jatyr. Durys tańdaý jasady dep oılaımyn. Óz kezeginde QR Mádenıet jáne sport mınıstrligi, Keńes Raqyshev basqaratyn Qazaqstan boks federasıasy tarapynan barlyq jaǵdaı jasaldy. Boksshylar men bapkerler olardyń ónerin búkil Qazaqstan tamashalaıtynyn biledi. Sondyqtan jaýapkershilikti túsinedi. Quramamyzǵa sáttilik tileımiz», - dep atap ótti Qazaqstan boks federasıasynyń atqarýshy dırektory Maratbek Myqtybekov.
Esterińizge sala ketsek, Belgradta ótken sońǵy álem chempıonatynda Qazaqstan quramasy 5 medal (2 altyn, 2 kúmis, 1 qola) ıelengen bolatyn. Serbıa astanasyndaǵy jahan birinshiliginiń 3 birdeı fınalısi (álem chempıony Sáken Bıbosynov, kúmis júldegerler – Mahmud Sabyrhan men Serik Temırjanov) Tashkent sharshy alańynda óner kórsetedi.
«Tashkenttegi álem chempıonatyna tıanaqty daıyndalýǵa múmkindik bolǵany úshin alǵys aıtamyn. Bir judyryq bolyp jumylyp jumys istesek, alynbaıtyn qamal joq. Quramadaǵy jigitter bir-birin árqashan qoldap júredi. Al men álem chempıony degen ataǵymdy qorǵap qalýǵa barymdy salamyn. Maqsatym – eki dúrkin álem chempıony ataný», - dedi Sáken Bıbosynov.
Álem chempıonatynyń bastalýyna týra bir apta qaldy. Jarys 1-14 mamyr aralyǵynda ótedi.
Uıymdatyrýshylar birinshilikke 104 elden 600-den asa bylǵary qolǵap sheberi qatysady dep otyr. Jeńimpazdar men júldegerler 13 salmaq dárejesi boıynsha anyqtalady.
Halyqaralyq boks qaýymdastyǵy (IBA) altyn medal ıegerine 200 myń AQSH dollaryn, ekinshi oryn alǵan boksshyǵa 100 myń jáne eki qola júldegerdiń árqaısysyna 50 myń AQSH dollarynan beredi. Chempıonattyń jalpy júlde qory 5,2 mln AQSH dollaryn quraıdy.
Boksshylar dodasynyń tikeleı translásıalary «Qazaqstan» jáne «Qazsport» telearnalarynyń efırinen kórsetiledi.