Qazir elimizde koronavırýs ınfeksıasy boıynsha epıdemıologıalyq jaǵdaı turaqtaldy.
Búgin Densaýlyq saqtaý mınıstri Alekseı Soı Úkimet otyrysynda Qazaqstan Respýblıkasyndaǵy epıdemıologıalyq jaǵdaı týraly aıtty, dep habarlaıdy Almaty-akshamy.kz QR Densaýlyq saqtaý mınıstrligi baspasóz qyzmetine silteme jasap.
10 maýsymdaǵy málimet boıynsha QR-da 397 976 naýqas Covid-19 juqtyrǵany anyqtaldy jáne 55 999 KVI jaǵdaıy tirkelgen. Osy jyldyń 6 maýsymynan bastap elimiz jasyl aımaqqa aýysty. Qyzyl aımaqta Nur-Sultan qalasy qaldy. Sary aımaqta 6 óńir bar: Almaty qalasy, Atyraý, Pavlodar, Batys Qazaqstan, Aqmola jáne Qaraǵandy oblystary. Jasyl aımaqta 10 óńir tur.
Jalpy, respýblıka boıynsha koronavırýs ınfeksıasyn juqtyrǵandar sany azaıyp keledi.
«Sońǵy aptada KVI anyqtalǵandar 11 myńnan 8 myńǵa deıin nemese ótken aptamen salystyrǵanda 1,3 ese azaıdy. Mamyrdan bastap aýrý 2,1 esege tómendedi», - dedi Alekseı Soı.
10 maýsymdaǵy jaǵdaı boıynsha respýblıkamyzdaǵy ınfeksıalyq tósekterdiń 24%-ynda, reanımasıalyq tósekterdiń 21%-ynda naýqas jatyr.
Óńirlerde ınfeksıalyq tósekterdiń, onyń ishinde Almaty qalasynda - 4 ese, Aqtóbe oblysynda - 3 ese, Almaty oblysynda - 2,5 ese, Túrkistan, Qyzylorda jáne Jambyl oblystarynda - 2 ese azaıǵany baıqalady.
Sońǵy aıda emdelip jatqan naýqastar sany 20 myńǵa nemese 2 esege azaıdy. Óńirlerde KVI juqtyrǵandar úshin qosymsha ashylǵan aýrýhanalar kezeń-kezeńimen qysqartyla bastady. Máselen, Nur-Sultanda 330 tósektik 4 stasıonar, Almatyda 2 myńǵa jýyq tósektik 11 stasıonar jabyldy.
Sonymen qatar, halyqty KVI-ge qarsy vaksınasıalaý jalǵasýda.
«Búgingi tańda vaksınanyń shamamen 3,6 mln dozasy paıdalanyldy, onyń ishinde 1 komponentpen 2 371 178 adam egildi, bul tıisti halyqtyń 24%-yn quraıdy. Ekinshi komponentpen 1 264 247 adam qamtyldy. Egý pýnktterinde vaksına dozalarynyń sany jetkilikti: birinshi komponenttiń shamamen 1,2 mln dozasy jáne ekinshi komponenttiń 835 myń dozasy bar. Vaksınany jetkizý jalǵasýda. Jergilikti atqarýshy organdar turǵyndar arasynda vaksınasıany jáne aqparattyq-túsindirý jumystaryn jandandyrýy qajet», - dep atap ótti Densaýlyq saqtaý mınıstri.
Jalpy, qazirgi ýaqytta respýblıkada koronavırýs ınfeksıasy boıynsha epıdemıologıalyq jaǵdaı turaqtaldy. Qazaqstan sary aımaqtan jasyl aımaqqa aýysty, boljam boıynsha aýrý optımısik senarıge sáıkes ótýde.