Keı óńirlerde burshaq jaýýy múmkin.
«Qazgıdromet» mamandary 28-30 shildesi kúnderi aýa raıy qandaı bolatynyn aıtty, dep habarlaıdy Almaty-akshamy.kz.
Mamandardyń aıtýynsha, Qazaqstannyń soltústik bóligindegi meteorologıalyq jaǵdaılar nasharlaı bastady. Munyń sebebi, respýblıkanyń aýmaǵyn ystyq ońtústik pen salqyn soltústikke bólgen atmosferalyq shep boldy.
«Frontaldy bóliktiń birtindep jyljýy, eldiń soltústik jartysynda, sodan keıin shyǵysynda, ońtústik-shyǵysynda naızaǵaıdyń bolýyna, jeldiń kúsheıýine, keı jerlerde burshaqtyń jaýyna ákelýi múmkin. Munyń bári, soltústikte kúndizgi aýa temperatýrasynyń tómendeýine jáne eldiń ońtústik jartysynda ystyqtyń báseńdeýine yqpal etedi», - delingen sınoptıkterdiń boljamynda.
Kúndizgi ýaqytta Qazaqstannyń soltústik-batysynda, soltústiginde aýa temperatýrasy kúndiz +20 +30°S-tan +15 +25°S-qa deıin, eldiń ortalyǵynda +25 +33 °S-tan +18 +27°S-qa deıin, shyǵys oblystarda aptap ystyq: +25 +35°S-tan +19+29°S -qa deıin tómendeıdi dep kútilýde. Qazaqstannyń ońtústiginde, ońtústik-shyǵysynda bolsa, +30 +39°S-tan +25 +36°S-qa deıin bolady dep boljanýda.