Aýyl ákimderiniń 64 paıyzy jergilikti jurttyń tikeleı saılaýymen qyzmetke keldi. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Jergilikti depýtattar aımaqtaǵy tekserý komısıalarymen tyǵyz qarym-qatynas ornatýy kerek. Bul komısıalardyń róli edáýir artyp, jaýapkershiligi kúsheıtiledi. Aldaǵy eki jylda pılottyq joba retinde aýdan jáne oblystyq mańyzy bar qala ákimderin tikeleı saılaý ótedi. Osy oraıda qajetti normatıvtik bazany jáne jol kartasyn ázirleý qajet. Úkimet bul jumysty Ortalyq saılaý komısıasymen jáne oblys ákimderimen birlesip júrgizedi. Biz qoǵamdy demokratıalandyrý jáne bılik quzyretterin tómenge berý úderisin jalǵastyramyz. «Jergilikti ózin-ózi basqarý týraly» zańnyń qabyldanýy bul baǵyttaǵy taǵy bir mańyzdy qadam bolmaq. Qazir tıisti zań jobasy Májiliste talqylanyp jatqanyn bilesizder», – dedi Qasym-Jomart Toqaev.
Prezıdent aýyl ákimderiniń basym bóligi saılanǵanyn aıtty.
«Aýyl ákimderi kún saıyn turǵyndardyń muń-muqtajyn tyńdap, máselelerin sheshedi. Sondyqtan olar elimizde aıryqsha ról atqarady. Aýyl ákimderiniń 64 paıyzy jergilikti jurttyń tikeleı saılaýymen qyzmetke keldi. Muny, shyn máninde, zor jetistik deýge bolady. Turǵyndardyń máselesin jedel ári tıimdi sheshý úshin olarǵa kóbirek múmkindik berilip jatyr. Bul jumys ta jalǵasyn tabady», – dedi Memleket basshysy.