Senat depýtaty Ǵalıasqar Sarybaev Úkimet basshysyna joldaǵan saýalynda elimizde jolaýshy tasymalyn 99 áýe kemesi iske asyryp jatqanyn málimdedi.
2030 jylǵa qaraı jolaýshy sany 24 mln-ǵa jetedi degen boljam bar. Sońǵy 30 jyldan beri áýe parkin jańartý jumysy mardymsyz júrgizilgen. Sondyqtan qoldanystaǵy áýe flotynyń qysqarý qaýpi bar, dep habarlaıdy Almaty-akshamy.kz 24.kz-ke silteme jasap.
Senator óńirlik áýejaılardyń talapqa saı bolýy úshin ınvestısıa tartý qajettigin atap ótti. Búginde tek 10-y ǵana táýlik boıy jumys isteıtin qoný júıesimen jabdyqtalǵan. Áýejaılardy sheteldik kompanıalarǵa tapsyrý da ulttyq qaýipsizdikti qamtamasyz etýde másele týyndatady.
Bul rette Senator avıasıa mekemelerin birlesip basqarý tetigin engizýdi usyndy. Sondaı-aq kadrlar daıarlyǵyna kóńil bólip, ýnıversıtetter bazasynda ǵylymı-zertteý ınstıtýttaryn qurý mańyzdy. Oǵan qosa otandyq zaýyttardy avıaotyn óndirýge qaıta baǵdarlaý qajet. Eske sala keteıik, áýemen qatynaıtyndardyń 70%-i «Air Astana»-nyń úlesinde bolsa, SCAT jolaýshynyń 23%-in, al qalǵanyn «Qazaq Air» tasıdy.