Josparǵa sáıkes, Ulttyq ekonomıka mınıstrligi Almaty oblysynyń ákimdigimen birlesip ekonomıkalyq esepterdi, jańa qalanyń sqemalyq kartasyn daıyndaý boıynsha jumystar júrgizdi. Sondaı-aq halyqpen jıyn ótkizilip, sonyń negizinde Almaty oblysy men İle, Talǵar aýdandary jáne Qonaev qalasy máslıhattarynyń sheshimderi qabyldandy.
"Jańa qalany qurý jol jelileri, ınjenerlik, áleýmettik ınfraqurylym obektilerin modernızasıalaýǵa, jańa jumys oryndaryn ashýǵa, ınvestısıalardy, tehnologıalardy, qosymsha qarjy aǵyndaryn tartýǵa, kásipkerlik belsendilikti damytýǵa, salyq túsimderin ulǵaıtýǵa múmkindik beredi. Bul óz kezeginde óńirdiń ınvestısıalyq tartymdylyǵy men ekonomıkalyq turaqtylyǵyn jaqsartýǵa yqpal etedi", - dep jazdy Qazaqstan Respýblıkasy Ulttyq ekonomıka mınıstrligi Telegram-kanalyna.
Sonymen qatar, Úkimet AEA (arnaıy ekonomıkalyq aımaq) aýmaǵyn 30 myń gektardan 96,5 myń gektarǵa deıin keńeıtý men G4 City AEA-ny Alatau AEA-ǵa qaıta ataý týraly sheshimdi maquldady.
"Osylaısha, Alataý qalasynyń barlyq aýmaǵy jáne Qonaev qalasynyń bir bóligi AEA aýmaǵyna jatqyzylady", dep jazylǵan Qazaqstan Respýblıkasy Ulttyq ekonomıka mınıstrliginiń habarlamasynda.
Arnaıy ekonomıkalyq aımaq aýmaǵynda qyzmettiń basym túrleri boıynsha EQJJ-nyń (ekonomıkalyq qyzmet túrleriniń jalpy jikteýishi) 17 ataýy negizinde 110 myń jańa jumys ornyn qura otyryp, jalpy somasy 12,5 trln teńgege 170-ten astam jobany ornalastyrý kózdelip otyr.
"Boljamdy derekterge sáıkes, AEA obektileri jobalyq qýatyna shyqqannan keıin búkil kezeńdegi baǵalanǵan jıyntyq úlesi 47,3 trln teńgeni, onyń ishinde mýltıplıkatıvtik áseri 17 trln teńgeni quraıdy", dep jazdy Qazaqstan Respýblıkasy Ulttyq ekonomıka mınıstrligi