Biz barlyǵymyz referendýmǵa úlken úmit artamyz
Konstıtýsıalyq reformany qoldaý úshin daýys berý - bul úlken jaýapkershilik jáne biz bárimiz osy proseske qatysýǵa tıispiz. Bul týraly Qazaqstan Respýblıkasy Parlamenti Májilisiniń depýtaty, «AMANAT» partıasy fraksıasynyń múshesi Bekqalı Torǵaev Alataý aýdanynyń jastarymen kezdesýde aldaǵy 5 maýsymda elimizdiń Ata zańyna túzetýlerdi túsindirý barysynda málimdedi, dep habarlaıdy Almaty-akshamy.kz.
«Bul jerde siz adam nemese partıa úshin daýys bermeısiz, óz bolashaǵyńyz úshin Jańa Qazaqstandy qurýǵa daýys beresiz. Biz barlyǵymyz referendýmǵa úlken úmit artamyz. Elimizdiń bolashaǵy – jastar», - dedi Torǵaev.
Májilismenniń sózin qalalyq shtab músheleri Nurıa Nıazova men Rýslan Nurlybaev qoldady.
«Qazirgi jastar – bul kreatıvti ıdeıalary men bolashaqqa úlken josparlary bar, neni qalaıtynyn biletin jas urpaq. Olardyń aldaǵy referendýmnyń mańyzdylyǵyn túsinetinderi qýantady. Bul olardyń eldegi qoǵamdyq-saıası jaǵdaıǵa degen joǵary jaýapkershiligin kórsetedi», - dep atap ótti partıanyń qalalyq shtabynyń múshesi Rýslan Nurlybaev.