Zerdeli yqshamaýdanynyń turǵyn úı massıvindegi aýlada senbilik ótti. Turǵyndar tanymal ártister, sportshylar, depýtattar jáne qoǵam belsendilerimen birge «Taza Qazaqstan» aksıasy aıasynda aýmaqty tazalady.
İs-sharaǵa qatysýshylarǵa arnaǵan quttyqtaý sózinde Almaty qalasy ákiminiń orynbasary Azamat Qaldybekov qala turǵyndarynyń ekologıalyq mádenıetin qalyptastyrýdyń mańyzdylyǵyn atap ótti:
"Adamdar, eń aldymen, ózderi tazalyqty saqtaý kerek: ózinen keıin tazalap, qoqys tastamaı, aǵashtardy syndyrmaýy kerek. Tabıǵatqa uqypty qaraýdy bala kezden úıretý qajet. Bul – barlyq almatylyq úshin ortaq is, qalany birge taza ustaıyq", – dedi ol, aksıaǵa belsene qatysqandarǵa alǵysyn bildire otyryp.
Almaty qalalyq Qoǵamdyq keńesiniń tóraǵasy Mahambet Hasenov bul mańyzdy iske azamattardyń birigýi qajet ekenin aıtty:
"Aksıanyń tabysty ótýi árbir almatylyqtyń belsendiligine tikeleı baılanysty. Tájirıbe turǵyndar ekologıalyq máselelerge barǵan saıyn kóbirek kóńil bóle bastaǵanyn, bul baǵytty ári qaraı damytý keregin kórsetti. Bul oraıda belsendiler men qoǵam ókilderiniń róli zor", – dedi ol.
Tazalyq jáne kórkeıtý sharasyna tanymal akterler, ánshiler, aqyndar men sportshylar da qatysty. Olar óz úlgilerimen tabıǵatty aıalaý jáne tazalyq saqtaý jolyndaǵy ekologıalyq bastamany qoldady. Qatysqandar qatarynda: akterler Sanjar Mádı, Táýekel Múslim, Jan Baıjanbaev, Erkebulan Daıyrov, Erden Tólemisov, Maqsat Sabıtov, Jandos Aıbasov, Jaıdarbek Kúngojınov, Ulan Núsipáli, Baqyt Tushaev, Tımýr Pıazov, Ondasyn Besikbasov; ánshiler Baqtıar Taılaqbaev pen İnjý Anýarbek, aqyndar Móldir Aıtbaı men Almas Ahmetbekuly, armrestlıngten halyqaralyq dárejedegi sport sheberi Spataı Temir, Qazaqstannyń eńbek sińirgen mádenıet qaıratkeri Amantaı Berǵalıuly jáne basqalar bar.
Tanymal teatr jáne kıno akteri Jan Baıjanbaev aksıanyń mańyzdylyǵy týraly óz pikirin bildirdi:
"Tazalyq – árkimniń ózinen bastalady. Qoqysty kórgende óziń de uıalyp, birtúrli bolyp qalasyń ǵoı. Biraq keıingi kezde qalamyz barǵan saıyn tazaryp kele jatqanyn baıqaımyn. Bul aksıanyń mańyzy óte zor", – dedi Jan Baıjanbaev.
Jergilikti turǵyndar uıymdastyrýshylarǵa alǵysyn bildirip, osyndaı sharalardyń turaqty túrde ótkizilip turýyna úmit bildirdi.