Saıaly yqshamaýdanynda boı kóterip jatqan jańa medısınalyq mekeme emhanalarǵa túsetin júktemeni azaıtyp, medısınalyq qyzmetti halyq úshin qoljetimdi etpek, dep habarlaıdy aqshamnews.kz
Alataý aýdanynyń Saıaly yqshamaýdanynda aýdan ákimdigi men Óńirlik komýnıkasıalar qyzmeti uıymdastyrǵan baspasóz týry ótti. İs-sharaǵa qatysýshylar 200 adamdy qabyldaı alatyn alǵashqy medısınalyq-sanıtarlyq kómek kórsetý ortalyǵynyń qurylysymen tanysty. Jobany 2025 jyldyń tamyz aıynda aıaqtaý josparlanǵan.
Saıaly yqshamaýdanyndaǵy ǵımarattyń jalpy aýmaǵy – 3 482 sharshy metr. Qazir ishki árleý jumystary júrgizilip jatyr: qabyrǵalar qaptalyp, terezeleri men vıtrajdary ornatylyp, elektr jelileri tartylýda. Qurylystyń 95%-y aıaqtalǵan.
Aýdan ákimi Talǵat Malybaevtyń aıtýynsha, nysan paıdalanýǵa berilgen soń, turǵyndarǵa dárigerlik kómek qoljetimdi bolyp, medısınalyq qyzmet sapasy jaqsarady.
«Saıaly men oǵan jaqyn mańdaǵy yqshamaýdandarda 30 myńnan astam adam turady. Soǵan qaramastan, bul aýmaqta áli kúnge deıin memlekettik emhana bolmaǵan. Jańa ambýlatorıa ashylǵannan keıin turǵyndar medısınalyq kómek alý úshin alysqa barmaıdy. Buryn Saıaly turǵyndary 2 shaqyrym jer júretin bolsa, endi bul nysan 500–800 metr jerde ornalasady», – deıdi Talǵat Malybaev.
Alataý aýdanyndaǵy medısınalyq uıymdardyń úılestirýshisi, №29 qalalyq emhananyń bas dárigeri Aqmıra Sadyqovanyń aıtýynsha, memlekettik normatıv boıynsha 10 myń adam turatyn eldi mekende emhana emes, ambýlatorıa ashylýy kerek.
«Qazir Saıaly-1 men Saıaly-2 yqshamaýdandarynda 8 myńnan astam adam turady. Olar №22 jáne №29 emhanalarǵa tirkelgen. Bul emhanalar 2,3–5,2 shaqyrym jerde ornalasqan. Sondyqtan halyqtyń tyǵyzdyǵyn eskere otyryp, osy joly otbasylyq-dárigerlik ambýlatorıa ashý sheshimi qabyldandy», – dedi Aqmıra Sadyqova.
Jańa medısınalyq mekeme №29 (Zerdeli yqshamaýdany) jáne №22 (Shańyraq-2 yqshamaýdany) emhanalarynyń júktemesin azaıtýǵa kómektespek. Bul, ásirese, kópqabatty turǵyn úılerde turatyn, júrip-turýy qıyn adamdar úshin yńǵaıly bolady.
Jańa ambýlatorıada jalpy tájirıbelik dárigerler, pedıatr, terapevt jáne ózge de mamandar qyzmet kórsetedi. Sonymen qatar, munda hırýrgıa, fızıoterapıa, stomatologıa kabınetteri men aldyn alý qyzmetteri de ashylady.
Ambýlatorıa aýmaǵy abattandyrylyp, turǵyndarǵa arnalǵan aleıa da salynady. Bul jumystardy Qurylys basqarmasynyń tapsyrysy boıynsha «Otaý-Qurmet» JSHS atqarýda. Jobanyń jalpy quny – 681 mıllıon teńge.
Nysan paıdalanýǵa berilgen soń, jańa ortalyq turǵyndardyń ómir súrý sapasyn arttyryp, medısınalyq qyzmet alýdy edáýir jeńildetpek.