Bıyl Májílís qandaı zańdardy qabyldady?

Bıyl Májílístíń úshínshí sessıyasynda 90 zań qabyldanyp, el ómíríníń túrlí salasyna qatysty mańyzdy ózgeríster engízíldí. Májílís tóraǵasy Erlan Qoshanov būl sessıyany "áleumettík ádílettílík pen zań ústemdígín nyǵaıtqan jyl" dep baǵalady. Bıylǵy sessıyada qabyldanǵan negízgí zańdar men sheshímder qandaı boldy? Aqshamnews.kz tílshísíníń materıalymen eske túsíríp óteıík. 

 7 áleumettík zań: medıtsına men bala qūqyǵy aldyńǵy qatarda

Májílís azamattardyń áleumettík jaǵdaıyna erekshe mán beríp, míndettí áleumettík medıtsınalyq saqtandyru júıesín qaıta qarady. Endí saqtandyrylmaǵan azamattar da alǵashqy júgíngen kezínde tegín kómek ala alady. Sonymen qatar:

• Onkologıyalyq skrınıngter – tegín medıtsınalyq kómektíń kepíldík berílgen kólemíne engízíldí;

• Estu qabíletí tómen balalar – jergílíktí byudjet esebínen estu apparatymen qamtamasyz etíledí.

Balalardyń qūqyǵyn qorǵau boıynsha:

• Kásíbı otbasy ınstıtuty engízílíp, balalar úıíne jíberudíń ornyna arnaıy otbasylar qamqorshy bolady;

• «Keleshek» jınaq júıesí engízílíp, balalarǵa bílímge arnalǵan qarjylyq qoldau artady;

• Halyqaralyq olımpıada jeńímpazdary – "Bolashaq" baǵdarlamasy arqyly grantty avtomatty túrde ala alady.

Qauípsízdík pen ádílet: jańa qylmystyq normalar men raqymshylyq

Qylmystyq zańnamalar da jańaryp, qoǵamdaǵy ózektí máselelerge tíkeleı jauap beretín bírqatar zańdar qabyldandy:

• Internet-alayaqtarǵa ("dropperlerge") jaza kúsheıtíldí;

• Nekege májbúrleu – endí qylmys sanalady;

• Bet-álpettí búrkemeleıtín kıímge tyıym salyndy;

• Esírtkímen alǵash ūstalǵan jastarǵa raqymshylyq qarastyrylyp, 3000-nan astam ís qaıta qaralyp jatyr. 

Sonymen qatar, Raqymshylyq turaly zań qabyldanyp, 15 myń adamnyń jaza merzímí qysqaryp, 2 myńǵa juyǵy bostandyqqa shyǵatyn boldy.

Ekonomıkada – 4 negízgí qūjat: salyq, byudjet, qor, derbestík

Májílís jańa Byudjet kodeksín qabyldap, byudjet rásímderín ekí ese qysqartty. Būl qarjynyń jūmsaluyn tıímdí árí ashyq etpek. Eń kóp talqylau tudyrǵan – jańa Salyq kodeksí:

"Bíz salyq auyrtpalyǵyn arttyru arqyly byudjet kírísín kóbeıtuge jol bermedík", – dedí Qoshanov.

Salyq júıesí endí halyq pen bıznes úshín túsíníktí, ádíl árí tūraqty bolmaq.

461 saual, 2 000 qabyldanǵan azamat

Sondaı-aq, Májílís bıyl Su kodeksín qabyldap, halyqty suǵa ūqypty qarauǵa jáne únemdeuge baulıtyn jańa tártíp ornatty.

• Su kodeksí – halyqty suǵa ūqypty qarauǵa baulıtyn alǵashqy zań;

• 36 halyqaralyq shart pen kelísím ratıfıkatsıyalandy;

• AES boıynsha referendumǵa daıyndyq kezeńínde Májílís belsendí ról atqardy;

• Ūlttyq qor aktıvterín basqaru strategıyasy jańartyldy.

Sonymen qatar, Májílís qoǵammen baılanysty kúsheıtu maqsatynda 461 deputattyq saual joldap, 2 myńnan astam azamatty jeke qabyldady. Joǵary audıtorlyq palata tóraǵasynyń esebí ekí ret tyńdalyp, auyl sharuashylyǵy men densaulyq saqtau salasyndaǵy túıtkílder talqylandy.