Alataý aýdanynda Naýryz meıramyn 21-22 naýryzda toılaý jáne 22 naýryzda «Almaty Arena» sport kesheninde «Tynda Music» aýqymdy sımfonıalyq konsertin ótkizý qarsańynda qala ákimdigi jol qozǵalysy men turaq uıymdastyrýdaǵy ýaqytsha ózgerister týraly habarlaıdy.
2025 jylǵy 19 naýryzda saǵat 00:00-den 24 naýryz kúni 00:00-ge deıin Momyshuly kóshesinen Dospanova kóshesine deıingi ýchaskedegi Ýnıversıadnaıa kóshesi boıynsha qozǵalys ýaqytsha shekteledi. Bul sheshim is-sharalarǵa qatysýshylardyń qaýipsizdigin qamtamasyz etýge, sondaı-aq qala turǵyndary men qonaqtary úshin qolaıly jaǵdaı jasaýǵa baǵyttalǵan.
22 naýryz kúni saǵat 19:00-de «Almaty Arenada» ótetin «Tynda Music» konsertine qatysýshylarǵa yńǵaıly bolý úshin, sondaı-aq Naýryz meıramynyń merekelik is-sharalary aıasynda qosymsha turaq aımaqtary uıymdastyrylady:
* Momyshuly kóshesindegi jańa meshit aýmaǵynda;
* «Almaty Arena» sport kesheniniń aýmaǵynda;
* «Alataý» dástúrli óner teatrynyń aýmaǵynda.
Qala ákimshiligi Almaty turǵyndary men qonaqtaryn marshrýttardy aldyn ala josparlaýǵa, jol qozǵalysyndaǵy ýaqytsha ózgeristerdi eskerýge jáne usynylǵan turaq aımaqtaryn paıdalanýǵa shaqyrady.