Ahmet Baıtursynulynyń mýzeı-úıi Alashtyń qara shańyraqtarynyń biri.
Byltyr Ahmet Baıtursynulynyń 150 jyldyq mereıtoıyna tartý retinde Ult ustazynyń týǵan ólkesinen Anadoly jurtyna deıin 5555 shaqyrymdyq velosherýdi 55 kúnde jalǵyz júgirip ótken velosaıahatshy, jýrnalıs, rekordsmen Ernat Melsuly Almatydaǵy «Ahmet úıine» sálem bere keldi, dep habarlaıdy Almaty-aqshamy.kz
Ol óziniń jankúıerlerimen júzdesip, velosherýdiń barysyn baıandap berdi.
Alash arystarynyń rýhyn tý etken patrıot azamatpen kezdesýge birqatar zıaly qaýym men BAQ ókilderi, dástúrli ónerdi nasıhattaýshy ónerpazdar qatysty.
Ernat Melsuly byltyrǵy velosherýin 5 qyrkúıek kúni, ıaǵnı Ult ustazynyń týǵan kúninde Torǵaı jerindegi Aqkól, Sartúbekten bastaǵan. Kaspıı men Qara teńizdi jaǵalap, Qap taýlaryn saǵalap, Anadoly túbegin aralap, 55 kúnde 5555 shaqyrym joldy basyp, saparyn Stambýlda tamamdaǵan.
Ernat Melsuly 2018 jyldan beri túrli velosherýler jasap, Qazaqstanda eki márte rekord jasaǵan. Sonyń birinde, byltyr aqpan aıynda Ult ustazynyń mereıtoıyna oraı ózi uıymdastyrǵan qysqy velosherýde Ernattyń esimi “KınES” rekordtar kitabyna engen bolatyn. Ol jankeshti jıhangez ǵana emes, jýrnalıs, ári oqytýshy, aýdarmashy. «Aǵylshynsha til syndyrý» kitabynyń, Qazaq English, «Aǵylshyn – aýyl úshin», «Abaı arqyly aǵylshynsha úıren», «Ǵylym tap - Find Science», «Tolyq adam jáne 4 damý» jobalarynyń avtory.
Arnaıy «Ahmet úıine» sálem bere kelgen E.Melsuly bir jasqa tolǵan qyzynyń týǵan kúnin de kıeli ordada qarsy alýdy kózdegenin aıtty. Byltyr A.Baıtursynulynyń mereıtoıy qarsańynda týǵan, ári mereıtoıǵa arnaǵan velosherýiniń jeńisine táńiriniń syılyǵy syndy dúnıege kelgen qyzyna Ult ustazynyń aıaýly jary Badrısafa Muhamedsadyqqyzynyń esimin bergen eken. «Ahmet úıindegi» jyly júzdesýden keıin kishkentaı Badrısafanyń tusaýkeseri Ult ustazy ómiriniń sońynda turǵan kıeli ordanyń úlken zalynda ótti.
Kezdesý barysynda E.Melsuly Ahmet Baıtursynuly ǵana emes, ózge de Alash arystaryn nasıhattaýǵa baǵyttalǵan jobalarymen de tanystyrdy.