Bıyl Alash kósemi, ensıklopedıst-ǵalym Halel Dosmuhamedulynyń týǵanyna 140 jyl. Medısına, til ǵylymy, t.b qoǵamnyń kez kelgen salasynda ólsheýsiz iz qaldyrǵan Alash arysynyń mereıtoıyn atap ótý Jańalyq aýylyndaǵy jıynnan bastaldy.
Arys qorynyń uıymdastyrýymen Saıası qýǵyn-súrgin qurbandary mýzeıinde «Ǵıbratty ǵalym – Halel» atty dóńgelek ústel ótti. İs-sharaǵa alashtanýshylar men tarıhshy-ǵalymdar qatysyp, Halel Dosmuhamedulynyń ult rýhanıatyna sińirgen eńbegi týraly sóz qozǵady. «Alash arystary» meshitinde marqumnyń rýhyna Quran baǵyshtalyp, as berildi.
«Bul kisiniń aralaspaǵan salasy joq. Barlyq salanyń basynda turǵan úlken aǵartýshy desek artyq aıtpaımyz. Halel Dosmuhamedulynyń 150 jyldyq mereıtoıyn álemdik deńgeıde atap ótý josparda bar», - dedi Arys qorynyń prezıdenti Ǵarıfolla Ánes.
24 sáýir kúni ult-azattyq qoǵalysy jetekshileriniń biri, Batys Alashorda úkimetiniń jetekshisi bolǵan Halel Dosmuhamedulynyń týǵanyna 140 jyl toldy. Osyǵan baılanysty Saıası qýǵyn-súrgin qurbandary mýzeıinde haleltanýshylar, alashtanýshy-ǵalymdardy shaqyryp, Alash qaıratkerine arnap dóńgelek ústel ótkizdik. Bizdiń mýzeı repressıa qurbandaryna arnalǵandyqtan, ult úshin qurban bolǵan barlyq tulǵanyń mereıtoıy nemese mańyzdy datalardy eske alý sharalaryn ótkizip turýǵa tyrysamyz. Bıyl saıası qýǵyn-súrginge ushyraǵan Alash qaıratkerleri Shákárim Qudaıberdiuly, Maǵjan Jumabaev, Sultanmahmut Toraıǵyrov syndy biraz tulǵanyń mereıtoıy bolǵaly tur. Alash qaıratkerlerinin bólek, kompartıanyń múshesi bolsa da, qazaqtyń múddesin qoldaǵan ult zıalylarymyz bar. Olardyń biri – Janaıdar Sádýaqasovtyń 125 jyldyǵy. Odan bólek T.Júrgenovtiń 125 jyldyǵy mereıtoılary osy mýzeıde ótedi, - deıdi Saıası qýǵyn-súrgin qurbandary mýzeıiniń meńgerýshisi Meıirjan MUSABAEV.
