Qazaqstanda alaıaqtyqtyń jańa tásili paıda bolǵan. Qaskóıler jeke kásipkerliktiń shotyn jalǵa berýdi suraıdy eken. Shotyn ýaqytsha bere turǵany úshin ústinen paıda kóretinin aıtady. Bul týraly almaty-akshamy.kz 31-arnanyń Informbúro jańalyqtar baǵdarlamasyna silteme jasap habarlaıdy.
Qaskóıler basqa adamnyń shoty arqyly saýda júrgizemin deıdi de, klıentterine taýardy bermeı ketedi. Zańgerler on shaqty adam sondaı alaıaqtyń qurbanyna aınalǵanyn aıtady.
Astanalyq kásipker áleýmettik jelide onlaın-dúkendi damytýǵa kómektesemiz degen beınerolıkke tap bolǵan. Sodan keıin olar áıelden tólem jasaý úshin onyń jeke shotyn suratqan. Bul úshin olar ústinen aqy tólep, satylymnyń paıyzyn berýge ýáde etti. Biraz ýaqyttan keıin onyń shoty arqyly qaskóıler tehnıka satqany belgili boldy, biraq taýardy klıentterine bermegen.
“Olardyń ótinishi boıynsha barlyq aqshany kartaǵa aýdardym. Kelesi kúni maǵan bireýler qońyraý shalyp, aqshany qaıtarýdy talap etedi. Men olarǵa aqshany almaǵanymdy, ondaı nıetim joq ekenin, meni de aldap ketkenin túsindiremin. Eki adam adam aqshany óndirip alý úshin meni azamattyq sotqa berdi”, – dedi elordalyq kásipker.
Kásipkerdiń aıtýynsha, polısıada aryz qaraýsyz qalǵan. Áıel alaıaqtardy taýyp, jazalaǵysy keledi. Zańgerler eshkimge jeke shottaryn bermeýge keńes beredi.
“Qurmetti dostar, eshqashan ózińizdiń jeke aqparatyńyzdy bermeńiz, derekterińizdi jarıa etpeńiz. Qyzyq nárse bolyp kórinetin, biraq kúmándi usynystarǵa kelispeńiz, sebebi onyń arty jaman bolýy múmkin”, – dedi zańger Evgenıı Iavorskıı.
Bul jaǵdaıda kinásizdigińizdi dáleldeý ońaı emes, deıdi sarapshy. Sondaı-aq polıseıler jeke málimetter men shottaryn belgisiz adamdarǵa, tipti jaqyn adamdarǵa bermeýge eskertedi