Býrabaıda ótip jatqan Ulttyq quryltaıda Memleket basshysy Qasym-Jomart Toqaev elimizdegi dinı ahýalǵa qatysty óz pikirin bildirip, bul máselege kóńil bólinetinin aıtty.
«Májilis depýtaty Ermurat Bapı elimizdegi dinı ahýalǵa alańdaýshylyq bildirip júr. Quryltaı músheleri Danıa Qydyrbaeva jáne Oljas Súleımen jat dinı aǵymdardyń jastar arasynda, ásirese sport salasynda yqpaly kúsheıip bara jatqanyn aıtty», – dep atap ótti Prezıdent.
Qasym-Jomart Toqaev elimizde teris dinı aǵymdarǵa, qazaqtyń bolmysyna jat ıdeologıalarǵa tosqaýyl qoıý qajettigine esh kúmán joq ekenin aıtty.
«Teris aǵymdarǵa, qazaqtyń bolmysyna jat ıdeologıalarǵa tosqaýyl qoıý qajet ekenine esh kúmán joq», – dedi Memleket basshysy.
Prezıdent Qazaqstanda din bostandyǵyna kepildik berilgenin, alaıda júgensizdikke jáne tártipsizdikke jol berilmeıtinin qadap aıtty.
«Dinniń asa mańyzdy mısıasy – ultty uıystyrý. Dinı uıymdardyń qyzmetin retteıtin qujattar osy talapqa saı bolýǵa tıis», – dep tolyqtyrdy ol.
Qasym-Jomart Toqaev bul máseleni jan-jaqty qaraý kerektigin atap ótip, zańnamany jańa jaǵdaıǵa beıimdeýdiń mańyzdylyǵyna toqtaldy.