Almatyda alaıaqtar ózderin ádilet departamentiniń qyzmetkerleri retinde tanystyrady.
Aram pıǵyldylar ózderin memlekettik organ qyzmetkerleri retinde tanystyrady. Osyǵan baılanysty Óńirlik komýnıkasıalar qyzmeti alańynda Almaty qalasy Ádilet departamenti ókilderiniń qatysýymen shuǵyl brıfıń ótkizildi.
Alaıaqtardyń qalaı aldap-arbaıtynyn atqarý óndirisin qamtamasyz etý jónindegi bólim basshysy Ánýar Jeksekov aıtyp berdi.
«Alaıaqtar bizdiń azamattarymyzǵa telefon soǵyp, ózderin Ádilet departamentiniń qyzmetkerleri retinde tanystyryp, aldaý jáne sendirý jolymen azamattarymyzdyń qarjylaryn sypyryp alady. Aram pıǵyldy alaıaqtar jalǵan ónimdi ınternet, áleýmettik jeliler arqyly joǵary baǵamen satý sqemasy arqyly jasaıdy. Al, aldanǵan turǵyndarmen kelisim jasalǵannan keıin, barlyq telefondardy óshiredi. Ári qaraı, alaıaqtar jábirlenýshilerge ózderin Ádilet departamentiniń qyzmetkerleri retinde tanystyryp, telefon shalady, alaıaqtardyń ustalǵany týraly habarlaıdy, jalǵan kýálikter beredi jáne ótemaqy tóleýge ýáde beredi. Alaıda aldyn ala komısıa túrinde tólem talap etedi», - dep túsindirdi Á.Jeksenov.
Ádilet departamentiniń materıaldyq-qarjylaı ótemaqy tólemeıtinin vedomstvonyń baspasóz hatshysy Almas Bekbotaev habarlady.
«Osyǵan uqsas faktiler 2022 jyldyń jeltoqsan aıynyń basynan tirkele bastaǵan. Ádilet departamenti Almaty qalasynyń polısıa departamentine barlyq dáleldeıtin materıaldarmen aryz joldady, qazirgi ýaqytta aryz tergeý satysynda tur. Soǵan qaramastan, alaıaqtar kúni búginge deıin adamdardy aldap keledi. Ádilet departamentine kún saıyn respýblıkanyń túkpir-túkpirinen kelgen azamattarymyzdan Almaty qalasy Ádilet departamentiniń qazirgi qyzmetkerleri týraly naqtylaý úshin qońyraýlar kelip túsedi», - deıdi A.Bekbotaev.
Vedomstvo ókilderi elimizdiń barsha turǵyndaryn óz týystaryn, dostary men tanystaryn alaıaqtyq faktileri týraly eskertýge, alaıaqtardyń arandatýshylyqtary men úgitterine senbeýge shaqyrdy. Osyndaı jaǵdaılar oryn alǵan jaǵdaıda, +77772522323 telefonyna habarlasyp, Almaty qalasy Ádilet departamentiniń qazirgi qyzmetkerleri týraly aqparat alýǵa bolady. Sonymen qatar, qyzmetkerlerdiń tizimderi Departamenttiń resmı saıtynda jarıalanǵan.