"BJZQ" AQ baspasóz qyzmetiniń málimetinshe, telefon arqyly jasalatyn alaıaqtyqtyń jańa túri – ózin BJZQ qyzmetkeri retinde tanystyryp, qandaı da bir kompanıanyń bas býhgalterine qońyraý shalyp, sol uıymnyń qyzmetkeriniń zeınetaqy shoty buǵattalǵany týraly habarlaıdy. Sebebi onyń kompanıa BSN-y bar tranzıttik shottaryna tyıym salynǵan.
Buǵattan shyǵarý maqsatynda býhgalterlerge alaıaqtardyń shotyna bereshek somanyń jartysyn salýǵa keńes beredi, áıtpese kompanıaǵa zeınetaqy jarnalaryn ýaqytyly eseptemegeni úshin aıyppul salynady dep qorqytady.
"Osylaısha, telefon arqyly sóılesý barysynda alaıaqtar qurbandaryn olardyń shottaryna kóp somada aýdarym jasaýǵa ıtermeleıdi. Zıankester álemniń kez kelgen elinde bolýy múmkin jáne kóbinese telefon nómirlerin ınternet jelisinen tabady, jábirlenýshiniń aty men áleýmettik jaǵdaıyn ártúrli messendjerler men qyzmetter arqyly áleýmettik jelilerden biledi".Biryńǵaı jınaqtaýshy zeınetaqy qorynyń baspasóz qyzmeti
Telefon alaıaqtarynyń qolynan qansha qazaqstandyq zardap shekkenin BJZQ naqtylamady. Degenmen BJZQ suraqtar týyndaǵan jaǵdaıda azamattarǵa tek 1418 telefony boıynsha resmı baılanys ortalyǵyna habarlasýǵa shaqyrdy nemese Biryńǵaı jınaqtaýshy zeınetaqy qorynyń qalalyq fılıaldaryna da keńes surap júginýge bolady.
Alaıaqtyń quryǵyna túsip qalmaý úshin myna nárseni bilgenińiz jón:
- BJZQ fýnksıalaryna salymshylar men alýshylarǵa jınaqtaýshy zeınetaqy júıesi máseleleri boıynsha aqyl-keńes berý, mindetti zeınetaqy jarnalaryn, mindetti kásiptik zeınetaqy jarnalaryn, erikti zeınetaqy jarnalaryn tartý, zeınetaqy jınaqtarynyń derbestendirilgen esebi jáne zeınetaqy tólemderin júzege asyrý kiredi;
- zeınetaqy jarnalaryn tóleýdiń tolyqtyǵy men ýaqytyly júrgizilýin BJZQ emes, salyq organdary baqylaıdy;
- zeınetaqy jarnalaryn uzaq ýaqyt boıy tólemegen jaǵdaıda, BJZQ qyzmetkerleri salymshylarǵa tólem jasamaý sebebin anyqtap, qajetti aqyl-keńes keńes berý maqsatynda ǵana qońyraý shala alady;
- BJZQ qyzmetkerleriniń qarajatty belgili bir shotqa aýdarýdy talap etýge quqyǵy joq.
Bul rette Ulttyq kásipkerler palatasy alaıaqtardyń áreketinen birinshi kezekte jeke kásip ıeleri men qyzmetkerleri, sondaı-aq jaýapkershiligi shekteýli seriktestikter qarjy turǵysynan zardap shegýi múmkin dep esepteıdi.
Almaty qalasy Kásipkerler palatasynyń bıznesti qorǵaý jónindegi basqarýshy dırektory Meırambek Qanybekovtiń aıtýynsha, esepshilerdiń telefon alaıaqtarymen sóz baılasýy jaǵdaıdy ýshyqtyrýy múmkin.
"Árıne, munyń qylmystyq máni bar jáne ony basqa bireýdiń menshigine jasalǵan qastandyq retinde qarastyrý kerek. Bul uıymdasqan qońyraýlar bolsa, odan da soraqy. Esepshiler alaıaqtarmen kelisimge kelýi múmkin. Biraq mundaı derekti tergeý ádisimen dáleldeýge týra keledi. Keıbir josyqsyz esepshiler mundaı qońyraýlarǵa ózderi bastamashylyq jasap, qyzmetkerdiń jeke derekterin berip, aqsha bopsalaýy múmkin. Bul basqa másele. Eger mundaı faktiler bolsa, onda quqyq qorǵaý organdaryna habarlasý kerek".Meırambek Qanybekov
Degenmen, onyń aıtýynsha, kásipkerler alaıaqtyqtyń jańa túrine qatysty shaǵymmen ázirge palataǵa júginbegen. Al is qylmystyq sıpatta bolǵandyqtan, bıznesmender kóbine tikeleı polısıaǵa júginedi. Bul turǵyda sarapshy jeke kompanıanyń tabysyna baılanysty shyǵyn kóp bolýy múmkin dep esepteıdi. Ol ózin qorǵaý úshin tek resmı organdarǵa senýdi jáne belgisiz nómirlerden qońyraýlardy qabyldamaýdy usyndy.