Olar azamattardan halyqty aldap júrgen kredıt menedjerlerin áshkereleýge kómektesýdi suraıtyn bolǵan.
Alaıaqtar qazaqstandyqtardy aldaýdyń jańa ádisin oılap tapty, dep habarlaıdy Almaty-akshamy.kz
Buryn «bankten» qońyraý shalý keń qoldanylsa, endi alaıaqtar jańa tásilge kóshken.
KTK arnasynyń habarlaýynsha, 48 jastaǵy Iýrıı Fomınyh kútpegen jerden qaryzǵa batqan. Ol 4 mıllıon teńgege eki kredıtti qalaı rásimdegenin túsinbeı otyr. Endi ol aı saıyn bankterge 120 000 teńge tóleýge májbúr. Onyń mundaı tólemge shamasy kelmeıdi.
Aıtýynsha, ol adamdardy aıaýsyz aldaıtyn ınternet-alaıaqtardy áshkereleımin dep qaryzǵa batqan. Beıtanys bireýler telefon soǵyp, ózderin Ulttyq banktiń qyzmetkerlerimiz dep tanystyrǵan, sypaıy sóılesip, kómek suraǵan. Iýrıı bul árekettiń astarynda alaıaqtardyń aram pıǵyly jatqanynan seziktenbeı, qolushyn sozýǵa birden kelisken.
«Olar bank qyzmetkerlerin tekserý kerek dep túsindirdi. Olar ózderin tanystyryp, aty-jónin, jeke kýálik nómirlerin, baılanys telefondaryn aıtty. Eger kúmándansam, ras-ótirigin anyqtaýyma bolatynyn jetkizdi. Men qaıta habarlasqanymda, rasynda da mundaı adamdar jumys isteıtinin aıtty. Sondyqtan senip qaldym», - dedi Fomınyh.
Alaıaqtar uıaly telefonǵa qońyraý shalyp, ózderin banktegi qaýipsizdik qyzmetiniń mamandary nemese polısıa qyzmetkeri dep tanystyrady. Keıin adamdardy aldap júrgen kredıt menedjerlerin áshkereleý úshin arnaıy operasıaǵa atsalysýdy suraıdy.
Alaıaqtardyń aıtýynsha, mundaı menedjerlerdi anyqtaý úshin kredıt alyp, aqshany arnaıy esepshotqa aýdarý kerek.
Al polıseıler halyqtan beıtanys adamdardyń qońyraýyna senbeýdi, olarǵa kredıt alyp bermeýdi suraıdy.
«İshki ister organdary júrgizip jatqan profılaktıkalyq jumystarǵa qaramastan, azamattardyń ańǵaldyǵy tańǵaldyrady. Bizdiń oblysta jumys istep turǵan bankterdiń qyzmetkerleri bankten eshkim telefon soqpaıtynyn jaqsy bilse de, ózderi alaıaqtardyń qurbany bolǵan. Kúdiktilerdiń kóp jaǵdaıda Qazaqstannan tys jerde bolýy qylmysty ashýdy qıyndatyp otyr. Sondyqtan jábirlenýshiler kredıtti tóleýge májbúr bolady», - dedi SQO PD aǵa jedel ýákili Andreı Akopán.