Shokolad satqan alaıaq sottaldy.
Astanalyq alaıaq dýbaı shokoladyn satamyn dep turǵyndardy aldap, birneshe ret olardyń aqshasyn ıemdenip alǵan, dep habarlaıdy aqshamnews.kz qalanyń qylmystyq ister jónindegi aýdanaralyq sotyna silteme jasap.
Astana qalasynyń qylmystyq ister jónindegi aýdanaralyq soty birneshe ret alaıaqtyq áreketter jasady (QK190-baby 3-bóliginiń 4) tarmaǵy) dep aıyptalǵan astanalyqqa qatysty isti qarady.
Astanalyq alaıaq dýbaı shokoladyn satamyn dep turǵyndardy aldap, birneshe ret olardyń aqshasyn ıemdenip alǵan. Jalpy 10 adamnyń 301 020 teńgesin jymqyrǵan. Alaıaqtyń kinási jábirlenýshilerdiń aıǵaqtarymen, banktik aýdarymdarmen jáne qylmystyq is materıaldarymen dáleldendi.
Prokýror 3 jyl 6 aı bas bostandyǵyn shekteý túrinde jaza taǵaıyndaýdy surady. Qorǵaýshy tarap bas bostandyǵynan aıyrýǵa baılanysty emes jaza taǵaıyndaýdy surady.
Qylmystyq kodekstiń 190-baby 3-bóligi 4) tarmaǵynyń sanksıasy múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan 6 jylǵa deıingi merzimge aıyra otyryp nemese onsyz, 3 jyldan 7 jylǵa deıingi merzimge bas bostandyǵyn shekteýdi ne aıyrýdy kózdeıdi. Jasaǵan isine ókiný jáne zıandy óteýi jaýapkershilik pen jazany jeńildetetin mán-jaılar dep tanyldy. Aýyrlatatyn mán-jaılar anyqtalǵan joq.
Sot úkimimen astanalyq alaıaq Qylmystyq kodekstiń 190-baby 3-bóliginiń 4) tarmaǵymen kináli dep tanylyp, 3 jylǵa bas bostandyǵyn shekteýge sottaldy.
Úkim zańdy kúshine engen joq.