QR Qarjy naryǵyn retteý jáne dasytý agenttigi (QNRDA) alaıaqtar sizdiń atyńyzǵa nesıe alsa, ne isteý kerektiri týraly nusqaýlyq ázirledi.
Onda óz quqyǵyńyzdy qorǵap, saldardy boldyrmaý úshin qandaı sharalar qabyldaý kerektigi jazylǵan, dep habarlaıdy aqshamnews.kz stopfake.kz-ke silteme jasap.
«Sizdiń atyńyzǵa kredıt resimdelgenin bilý úshin kredıttik tarıhyńyzdy jıi tekserip turý qajet. Esepti Memlekettik kredıttik búrodan, Birinshi kredıttik búrodan, HQKO-dan nemese egov.kz portaly arqyly alýǵa bolady. Kredıttik tarıhyńyzdy toqsan saıyn keminde bir ret tekserip turǵan jón», – dep habarlaıdy vedomstvo.
Alaıaqtar kredıt resimdegen jaǵdaıda ne isteý kerek:
– qaryz resimdelgen kredıttik uıymnyń ataýyn bilip, onda ótinishpen júginińiz;
– kredıtordan mindetti túrde ishki qyzmettik tergep-tekserýdi júrgizýdi talap etińiz;
– sharttyń, oǵan qosymshalardyń jáne jeke basty kýálandyratyn qujattardyń kóshirmelerin, sondaı-aq aqsha aýdarylǵan shot derektemelerin talap etińiz;
– kredıt bergen jáne shartty resimdegen qyzmetkerdiń derekterin naqtylańyz;
– quqyq qorǵaý organdaryna ótinish berińiz.
«Quqyq qorǵaý organdary ótinishińizdi tirkeýi kerek. Sonymen qatar sizde qalatyn ótinishtiń kóshirmesinde qujattyń qabyldanǵan kúni kórsetilgen tirkeý nómiri bolýy shart», – deıdi QNRDA ókilderi.
Kredıttik uıym qujattardy bermese, QR Qarjy naryǵyn retteý jáne damytý agenttigine shaǵymmen júginý kerek.
«Eger kredıttik uıym aqshany sizdiń jeke kýáligińiz boıynsha alaıaqtar alǵanyn dáleldeı almasa, ornalasqan jeri boıynsha sotqa mámileni jaramsyz dep taný týraly talap aryzben júginý qajet. Eger sot sizdiń paıdańyzǵa sheshim shyǵarsa, onda kredıttik uıym sizden qaryz tóleýdi talap etýdi toqtatady, bereshekti esepten shyǵarady», – deıdi vedomstvodaǵylar.
Sondaı-aq, qaryz bergen uıymǵa kredıttik búroǵa sizdiń nesıe tarıhyńyzdan basqa bireýdiń qaryzy boıynsha aqparatty alyp tastaý týraly hat jiberý kerek.