4–5 qazanda Respýblıka saraıynyń aldyndaǵy Abaı alańynda Almaty týrızm basqarmasynyń qoldaýymen halyqaralyq ALA CRAFT 2025 qolóner festıvali ótedi.
İs-sharaǵa Qazaqstannan jáne shetelden kelgen 100-den astam sheber qatysyp, dástúrli jáne zamanaýı qolóner týyndylarynyń úzdik úlgilerin usynady, dep habarlaıdy Aqshamnews.kz.
Qonaqtardy avtorlyq buıymdar jármeńkesi, ashyq sheberlik dáristeri jáne «Sheber» respýblıkalyq baıqaýynyń úzdik jumystarynyń kórmesi kútedi. Baıqaýdyń júlde qory seriktes Chevron kompanıasynyń qoldaýymen qamtamasyz etilgen. Jeńimpazdar shetelde bilim alyp, basqa elderdiń áriptesterimen tájirıbe almasýǵa múmkindik alady.
Festıváldiń basty oqıǵalarynyń biri – Almatyǵa Dúnıejúzilik qolónershiler keńesiniń (World Craft Council) sheshimimen «Álemdik qolónershiler qalasy» mártebesiniń resmı túrde berilýi. Bul qalanyń baı qolóner dástúri men óńirdiń kreatıvti ekonomıkasyn damytýǵa qosqan úlesiniń halyqaralyq deńgeıde moıyndalýy.
Zergerler Serikqalı Kókenov, Serik Ryspekov, Serjan Bashırov, mýzykalyq aspap sheberi Jolaýshy Turdyǵulov, sondaı-aq etno-dızaınerler Aıjan Bekqulova, Tilek Sultan, Áýes Saǵynaeva jáne Aıdarhan Qalıev jetekshilik etetin Aspara brendi syndy belgili qazaqstandyq sheberler buıymdaryn tanystyrady.
Sheteldik qonaqtardyń qatarynda WCC Azıa-Tynyq muhıty aımaǵynyń prezıdenti Djýd van der Merve (Avstralıa), vıse-prezıdent Leıla Ýolter (Jańa Zelandıa), keńesshi Azız Mýrtazaev (Ózbekstan), sondaı-aq Smithsonian Center for Folklife and Cultural Heritage (AQSH) delegasıasy bar.