Bıyl shildede bastalǵan Dostyq dańǵylynan Asqarov kóshesine deıingi ál-Farabı dańǵylyn ortasha jóndeý barysynda synǵan nemese aqaýy bar granıtti jıektastar tegisteldi
Barlyǵy osy aýmaqta uzyndyǵy 9,3 km 25,3 myń metr borttyq tastar ornatyldy. Ortasha jóndeý barysynda onyń ishinde 16, 4 myń metr jıektastardy tegisteý úshin bólshekteldi, al aqaýyna baılanysty qaıta paıdalanýǵa jatpaıtyn 780 metr jıektastar ǵana aýystyryldy, dep habarlaıdy Almaty-akshamy.kz.
Osylaısha, osy dańǵyldaǵy jańadan aýystyrylǵan jıektastardyń úlesi shamamen 3% (bul qala boıynsha jańasyna aýystyrýdyń ortasha kórsetkishi).
Jıekter kólik apatyna baılanysty zaqymdalýy nemese jyljýy múmkin. Jol jabyny men jıektas arasyndaǵy sańylaýlarǵa baılanysty joldarda jaryqtar paıda bolady. Sondyqtan jol sapaly bolýy úshin asfáltbeton tósemes buryn jıektastardy tegistep qoıý kerek.
Tegisteý – bul jyljyp ketken granıtti jıektastardy alyp tastap, jol jıegine ornatý. Bul jol tóseminiń paıdalaný sapasyn arttyrý úshin júzege asyrylady.
Buǵan deıin Bostandyq aýdanynyń turǵyndarymen kezdesýde Almaty ákimi Erbolat Dosaev Almaty joldarynda jıektastardyń tek eki túri bar ekenin atap ótken.
«Sementti-qumdy bul jıektastar syǵymdalyp, sodan keıin ornatylady. Qysta joldardy hımıalyq zattarmen óńdeıtinimizdi, arnaıy tehnıkamen tazalaýdy, qaǵyp ketýdi eskersek, olardy 5 jylǵa deıin paıdalanýǵa bolady. Jıektastardyń ekinshi túri – 10 jyldan 15 jylǵa deıin paıdalanýǵa bolatyn granıtti túri. Ál-Farabı dańǵylynda jıektastardyń 20-25%-yn aýystyramyz dep oıladyq, biraq tek 3%-yn aýystyrdyq», - dedi ol.
Esterińizge sala keteıik, ál-Farabı dańǵylynda ortasha jóndeý jumystary merziminen 2 apta buryn – 16 tamyzda aıaqtaldy. Qala turǵyndaryna yńǵaıly bolý úshin jumys túnde júrgizildi. Brıgadalar kúsheıtilgen rejımde jumys istedi. Trotýarlardy jóndeý de 31 tamyzǵa deıin bitedi. Bıylǵy jol jóndeý kezinde alǵash ret polımerler qosylǵan asfáltbeton qospasy qoldanyldy. Onyń artyqshylyǵy jol jabynynyń paıdalaný merzimin uzartý, joldyń sapasy men aıazǵa tózimdiligin qamtamasyz etedi.
Sońǵy ret ál-Farabı dańǵylynda jóndeý jumystary 2010 jyly ǵana júrgizildi. Normatıvtik jóndeýaralyq merzimniń ótýine baılanysty tekserý júrgizildi, onyń barysynda asfáltbeton tóseminde shuńqyr, oıyq, jaryq syndy aqaýlar anyqtalyp, joldyń qazirgi jaǵdaıyna tehnıkalyq qorytyndy jasaldy.