Búgin “Alatau-Aqparat” medıaholdınginiń shańyraǵynda Ál-Farabı atyndaǵy Qazaq ulttyq ýnıversıtetiniń Basqarma múshesi – áleýmettik damý jónindegi prorektory Baqytjan Omarov qonaqta boldy. Qurmetti meımandy medıaholdıngtiń bas dırektory Erjan Qalymbaıuly jáne ujym músheleri qarsy aldy.
Baqytjan Omarov óz sózinde ýnıversıtet rektory Janseıit Qanseıituly Túımebaevtyń bastamasymen QazUÝ-da aýqymdy ister atqarylyp jatqanyn atap ótti.
“Búginde ýnıversıtet jasandy ıntellektini damytý, robototehnıka men sýperkompúter ortalyǵynyń jumysyn jetildirý baǵytynda naqty qadamdar jasap keledi. QazUÝ bazasyndaǵy sýperkompúter — Ortalyq Azıadaǵy eń qýatty esepteý qurylǵylarynyń biri, al jaqyn ýaqytta ýnıversıtet ǵalymdary dron qurastyrý jobasyn iske qospaq”, - dedi ol.
Kezdesý barysynda taraptar medıa jáne bilim salasyndaǵy ózara baılanystardy nyǵaıtý, jańa jobalardy júzege asyrý jáne jas mamandardy daıarlaý baǵytyndaǵy seriktestikti talqylady. Ásirese, QazUÝ stýdentteriniń tájirıbeden ótý múmkindigin keńeıtý, óńirlik medıa keńistikte ózderin kásibı turǵydan shyńdaý máselelerine erekshe nazar aýdaryldy.
Óz kezeginde medıaholdıng basshysy Erjan Qalymbaıuly joǵary oqý oryndarymen tyǵyz baılanys ornatýdyń mańyzdylyǵyna toqtaldy. Onyń aıtýynsha, “Alatau-Aqparat” redaksıalary jas jýrnalıserge kásibı ortada tájirıbe jınaqtap, zamanaýı medıa úrdistermen tanysýǵa múmkindik berýge daıyn.
Burynnan bar memorandým aıasynda medıaholdıng jumys berýshi retinde jyl saıyn QazUÝ stýdentterin jumysqa qabyldap keledi.
Kezdesý barysynda Baqytjan Omarov jańadan ashylǵan telestýdıanyń jumysymen jáne talaı jyldyq tarıhy bar medıaholdıngtiń mýzeı-kabınetimen tanysty.
Kezdesý sońynda taraptar ózara yntymaqtastyq týraly kelisimge kelip, aldaǵy ýaqytta birlesken jobalar, onyń ishinde, “Vechernıı Almaty” gazetiniń 90 jyldyǵy aıasynda birlesken jobalar men is-sharalar uıymdastyrýǵa ýaǵdalasty.