Aqtaýdaǵy qandy oqıǵa: ádildik izdegen ananyń haty
Mańǵystaý oblysy, Aqtaý qalasynda ádiletsizdik boldy. Aqshamnews.kz redaksıasyna osyndaı hat keldi. Hatty jazǵan – kisi qolynan qaza bolǵan jasóspirimniń isi boıynsha kúdikti ári osy qylmysty jasady dep aıyptalyp otyrǵan jigittiń anasy. Ol bul iste ádiletsizdik oryn alǵanyn jáne qylmysqa qatysy bar negizgi fıgýranttardyń bostandyqqa júrgenine qapaly.
Oqıǵanyń mán-jaıy
Redaksıamyzǵa hat jazyp, kómek suraǵan ananyń aıtýynsha, 2025 jylǵy 8 sáýirde Mańǵystaý oblysy, Beıneý aýdany, Aqjigit aýylynda 17 jastaǵy Saǵyndyq esimdi jasóspirimdi aýyldyń birneshe “starshak” jigitteri jabylyp uryp óltirgen. Qaıtys bolǵan bozbala – otbasyndaǵy jalǵyz ul eken.
Qaıǵyly oqıǵa boıynsha qazir bir ǵana jasóspirim qamaýǵa alynǵan. Qazir osy iske qatysty jalǵyz aıyptalýshy J.-nyń anasynyń sózine sensek, munda negizinen 13 kúdikti bar. Tergeý barysynda Beıneý aýdandyq tergeýshisi Nurlybek Madıev isti burmalap, basty kúdikti – M. esimdi jigitti jaýapkershilikten qutqaryp jibergen, deıdi arasha surap, ádildik izdegen ana.
Anasynyń sózine sensek, osy iske tikeleı qatysty M.-nyń týǵan jezdesi Mańǵystaý oblystyq prokýratýrasynda qyzmet etedi. Al ákesi aýylda bedeldi, mal sharýashylyǵymen aınalysatyn dáýletti azamat eken. Osy sebepti, basty kúdikti jazadan qutylyp otyr.
Qaza tapqan balanyń ata-anasy – zeınetkerler, al qamaýda otyrǵan jasóspirimniń ata-anasy da qarapaıym, tireýsiz adamdar.
Resmı organdardyń jaýaby
İstiń jaı-japsaryn anyqtaý maqsatynda Aqshamnews.kz redaksıasy Mańǵystaý oblystyq Polısıa departamentine resmı saýal joldady. Vedomstvonyń aqparattyq saıasat bólimi:
«Atalǵan qylmystyq is boıynsha Mańǵystaý oblystyq sotyna júginýdi suraımyz», – dep qysqa qaıyrdy.
Sonymen qatar, iske qatysty sheshimdi shyǵarǵan Mańǵystaý aýdandyq sotyna da resmı saýal joldandy. Sottyń jaýaby da qysqa boldy:
«Sizdiń joldaǵan suraǵyńyzǵa baılanysty habarlaımyz. İs boıynsha úkim zańdy kúshine engennen keıin sizge tolyq jaýap usynylady».
Bizge belgilisi, qylmystyq is boıynsha Mańǵystaý aýdandyq soty osy iske kináli dep J.J-ny 10 jylǵa sottady.
Bul – tek bir otbasynyń qasireti ǵana emes, qazaqstandyqtardyń ádilet júıesine degen senimi turǵysynan asa mańyzdy is. Jábirlenýshi jaq ádildiktiń ornaýyn suraıdy. Aqshamnews.kz redaksıasy aldaǵy ýaqytta bul isti nazarda ustaıdy