9 qarashada saǵat 11:36-da «103» jedel járdem qyzmetine Aqtóbe oblysy, Saryjar aýylyna jaqyn mańda tikushaqtyń qulaǵany týraly habar túsken, dep habarlaıdy aqshamnews.kz.
Apat ornyna jetken Martúk aýdandyq aýrýhanasynyń jedel járdem brıgadasy zardap shekken eki adamǵa alǵashqy kómek kórsetti. Bir adam jedel járdem kóligi kelgenge deıin qaıtys bolǵan.
Aqtóbe qalasynyń áýejaıyna jetkizilgen zardap shegýshilerdi reanımasıalyq brıgada qarsy aldy. Kúıik shalǵan eki naýqas oblystyq aýrýhanaǵa jetkizildi. Aýrýhanada reanımatolog, travmatolog jáne kombýstıologtar naýqastardy qabyldaý bóliminde kútip aldy.
Qazirgi tańda zardap shekkenderdiń jaǵdaıy aýyr, biraq turaqty. Pasıentter esinde, suraqtarǵa jaýap beredi. Qazirgi ýaqytta olar aýrýhananyń qarqyndy terapıa bóliminde (ORIT) em qabyldap jatyr, dıagnostıkalyq tekserýler júrgizilýde.