Kásipkerlik salasynyń ókilderi de syılyqtan qur qalmady
Elordadaǵy Rixos President Astana qonaqúıinde dástúrli «Halyqtyń súıiktisi» ulttyq syılyǵynyń laýreattaryn marapattaý rásimi ótti, dep habarlaıdy Almaty-akshamy.kz turkystan.kz-ke silteme jasap.
2011 jyldan beri ótkizilip kele jatqan baıqaýda bul joly ataqty akter, QR Halyq ártisi Nurjuman Yqtymbaev Qazaqstannyń damýyna úlken úles qosqan aǵa býyn ókilderine beriletin «Altyn dáýir» atalymynyń jeńimpazy atandy. Keńes Odaǵynyń barlyq derlik kınostýdıalarynda oınap, mıllıondaǵan telekórermenniń súıikti akteri Nurjuman Baıjumanuly byltyr 80 jasqa toldy. Shara uıymdastyrýshylary men qazylar alqasy akterdiń mereıtoıyna oraı bedeldi syılyqty tabystaý týraly sheshim qabyldaǵan.
Aıta ketsek, buǵan deıin «Altyn dáýir» atalymy Qazaqstannyń damýyna úlken úles qosqan belgili qazaqstandyqtar – Iýrıı Pomeransev, Lakı Kesoglý, Myrzataı Joldasbekov, Irak Elekeev, Shómishbaı Sarıev jáne basqa da kóptegen azamattarǵa tabystalǵan bolatyn.
Kásipkerlik salasynyń ókilderi de syılyqtan qur qalmady. El ekonomıkasynyń damýyna eleýli úles qosqan bıznesmenderdiń ishinen tanymal kásipker, qoǵam qaıratkeri, «Imstalkon-Temirtaý» JSHS basshysy Ivan Georgadıǵa «Jyl bıznesmeni» atalymy buıyrdy. Sondaı-aq, Soltústik Qazaqstan oblysyndaǵy «Semeınyı» sýpermarketter jelisi jáne onyń basshysy Andreı Isaakovtyń soltústik óńirdiń ekonomıkasyna qosqan úlesi eskerildi. Kóptegen áleýmettik jobalarǵa bastamashy bolǵan kásipkerdiń sýpermarketter jelisi «Jyldyń úzdik áleýmettik bıznesi» atalymynda top jardy.
Azattyq Rýhy agenttigi ekinshi jyl qatarynan «Halyqtyń súıiktisi» syılyǵynyń jeńimpazy atandy.
1994 jyly Tájik-Aýǵan shekarasynda bandalyq qurylymdarmen bolǵan qaqtyǵysta erlikpen qaza tapqan qazaqstandyq Radjan Batyrqanov «Erjúrek júrek» atalymyna laıyq dep tanyldy. Túrkimenstan men Tájikstan prezıdentteri Radjan Batyrqanovty óz elderiniń joǵary nagradalarymen marapattaǵan bolatyn. «Halyqtyń súıiktisi» marapaty batyrdyń anasy Qızat Batyrqanovaǵa tabystaldy.
Sonymen qatar, otandyq sport juldyzy, byltyrǵy paralımpıada oıyndarynyń chempıony Davıd Degtárev «Jyldyń úzdik sportshysy» atalymynda aldyna jan salmady. Al «Jyldyń úzdik dárigeri» atalymynda tanymal qazaqstandyq hırýrg Iýrıı Pá jeńiske jetti.