Kondratovıch pen Erjanov kóshesiniń qıylysy adam tanymastaı ózgergen
Aıtylǵan sóz, berilgen ýáde. Almaty ákimi Túrksib aýdany turǵyndarymen kezdesýinen keıin oń ózgeristerdiń oryn alǵanyn aıtyp, alǵys bildirdi, dep habarlaıdy Almaty-akshamy.kz Almaty.tv-ge silteme jasap.
Túrksib aýdanynda turatyn Lada Kolchýgına Almaty ákimi Erbolat Dosaevpen kezdesýge barǵan. Onyń aıtýynsha, Zakarpatskaıa kóshesi arqyly aıaldamaǵa jetý, oqýshylardy mektepke tasý halyq úshin muń bolǵan. Ásirese, arba súıregen analar qınalady. Kólik tizgindegiler temir tulparlaryn týra kóshe boıyna qoıyp ketetin edi. Endi mine berilgen ýáde oryndalyp, júrginshiler joly salyndy. Onyń eni keńeıtilip, kólikke emes, halyqqa arnalǵan aýmaq artty.
«Halyq únine qulaq asatyn memleket» degen tujyrymdamanyń shyn máninde jumys isteıtine qýanyshtymyn. Aıtqan usynysymyz jerde qalmady. Alǵysym sheksiz. Qazir júrgizýshiler kóligin bizge kedergi keltirmeıtindeı etip qoıady. Halyqqa júrý qaýipsiz boldy. Jol anaǵurlym keńeıdi. Buryn bul jermen júrgende janymyzdy shúberekke túıip júretinbiz», – dedi qala turǵyny Lada Kolchýgına.
Al Kondratovıch pen Erjanov kóshesiniń qıylysy adam tanymastaı ózgergen. «Basqarasý» ózeniniń mańy birneshe aı buryn qaraýsyz qalǵan jer edi. Halyqtyń suraýy «Halyq qatysatyn búdjet» jobasy aıasynda iske asty. Eki kósheni jalǵaıtyn kópir salynyp, halyqqa demalys aýmaǵy jasalyndy. Oǵan qosa, fýtbol jáne zamanaýı oıyn alańy da bar.
«Erjanov pen Kondratovıch kóshesiniń arasyn jalǵaıtyn kópir qurastyryldy. Bul jerde úlken kisiler jáne de jas balalar, jasópsirimder mektepke baratyn bolady. Eń alǵash turǵyndardyń suranysy eki ortada balalardyń júrýine qolaısyz bolǵandyqtan, ýaqytsha jaıaý júrginshiler jolyn salý usynylǵan bolatyn. Al biz tolyqtaı qamtýdy sheshtik», – dedi Túrksib aýdandyq kóriktendirý bóliminiń basshysy Sáken Baıasyl.
Kezdesýdegi kóriktindirýge qatysty 20 shaqty turǵynnyń suraq qoıdy. Olar qazir sheshilip jatyr.