Ǵasyr jasaǵan keıýana, 101 jastaǵy jambyldyq Jumabúbi Ahmetova ájeı óz úıinde saılaýǵa daýys berip, osylaı dedi.
Jambyl oblysynda 101 jasqa kelgen ájeı daýys berdi, dep habarlaıdy Almaty-akshamy.kz «Aıqyn» gazetine silteme jasap.
Merki aýdany, Andas batyr aýylynyń turǵynyna tasymaldaý jáshigin saılaý komısıasynyń músheleri aparyp, №297 saılaý ýchaskesi arqyly daýsyn qabyldady. Qos ǵasyr kórgen keıýana eldiń amandyǵyn tilep, aq batasyn berdi.
«Elimiz aman, jurtymyz tynysh bolǵaı. Osy jasyma kelip, daýys berip otyrǵanyma qýanyshtymyn. Prezıdentimiz aýyl ákimderin saılaý týraly Jarlyq shyǵarǵannan keıin osy kúndi asyǵa kúttim. Mine, búgin óz tańdaýymdy jasap otyrmyn. Qudaı buıyrsa, aýylǵa ákim bolar azamat adalynan kelsin dep tileımin. Eń bastysy, qulqynyn emes, ultyn oılasyn. Sonda ǵana ony halyq qoldaıdy. Urpaǵymyz álemdi jaılap jatqan keselden aman bolsyn! Biz kórmegen qyzyqty solarǵa buıyrtsyn!» – deıdi Jumabúbi ájeı.