«Búgin Qazaqstanda alǵash ret aýyl ákimderiniń tikeleı saılaýy ótýde. Bul – Prezıdent aıtqandaı, elimizde saıası jańǵyrýdyń jańa kezeńin ashatyn óte mańyzdy sát.
Memleket basshysy ótken jylǵy Joldaýynda ákimderdi tikeleı saılaý týraly bastama kótergen bolatyn. Nátıjesinde, ony usynǵannan bastap naqty iske asyrylǵanǵa deıin bir jyldan az ýaqyt ótti.
Aýyl ákimderin saılaý azamattarǵa óz eldi mekenderiniń damýyna tikeleı yqpal etýge jańa múmkindikter ashady. Olar memlekettik basqarý júıesiniń jumys isteýiniń jańa uzaq merzimdi qaǵıdattaryn qalyptastyrady, memleket pen qoǵam arasyndaǵy ózara qarym-qatynastardyń sıpatyn sapaly túrde ózgertedi.
Sondyqtan bul saılaý naýqanynyń barysy azamattar arasynda úlken qyzyǵýshylyq týdyrdy, eldiń saıası órisin jandandyrýǵa ákeldi jáne jergilikti jerlerde saıası básekelestiktiń artqanyn kórsetti. Osy turǵydan alǵanda, barlyq 6 saıası partıanyń óz kandıdattaryn usynǵany, kóptegen ózin-ózi usynýshylar tirkelgeni de mańyzdy.
Jalpy, Qasym-Jomart Toqaev bastamashy bolǵan úsh saıası baǵyt sheńberindegi barlyq ózgerister dáıekti túrde is júzinde júzege asyrylyp, qoǵamnyń suranystaryna saı keledi jáne eldiń odan ári demokratıalanýyna yqpal etedi».