Jumystar júrgizilip jatyr.
Almaty oblysynyń ákimi Qanat Bozymbaev Uıǵyr aýdanynyń halqymen kezdesip, turǵyndardyń saýalyna jaýap berip, atqarylyp jatqan jumystar jóninde baıandady, dep habarlaıdy Almaty-akshamy.kz.
«Uıǵyr aýdanynyń ataýyn aýystyrý týraly saýalǵa bergen jaýabynda Almaty oblysynyń ákimi ótken jyldyń jeltoqsan aıynda bolǵan turǵyndarmen kezdesýinde aqsaqaldar osy máseleni kótergenin, aýdannyń tól tarıhı ataýyn anyqtaý úshin ǵalymdardyń da bul iske qosylýyn suraǵanyn aıtty. Soǵan baılanysty Til jáne Shoqan Ýálıhanov atyndaǵy tarıh jáne etnologıa ınstıtýttary jasaǵan saraptama tıisti memlekettik organǵa usynylǵanyn jetkizdi. Ázirshe naqty bir saıası sheshim jasalǵan joq. Degenmen qazir aldyn ala jumystar júrgizilip jatyr», - delingen Almaty oblysy ákiminiń baspasóz qyzmetiniń habarlamasynda.
Almaty oblysynyń ákimi Qanat Bozymbaevpen kezdesý barysynda jergilikti pedagogter 550 oryndyq mektepte 600-den astam bala oqyp jatqanyn, oǵan qosa ǵımaratta óner mektebin ashý josparlanyp otyrǵanyn jetkizdi. Olar bul oqý prosesine kedergi keltiredi dep esepteıdi.
Oblystyq bilim basqarmasy basshysynyń mindetin atqarýshy Jańyl Súleımenovanyń aıtýynsha, balalarǵa qosymsha bilim kerek, úıirmeler qyzmetin uıymdastyrý áli de qarastyrylyp jatyr. Atap aıtqanda, osy mekteptiń bazasynda mektepke deıingi shaǵyn ortalyq jumys istegen, oblysta qosymsha bilim berý deńgeıiniń tómen ekenin eskerip, osy baǵytty damytýdyń túrli joldary qarastyrylyp jatyr.
Turǵyndar memlekettik turǵyn úı qorynan úı alý máselesin de ózekti deıdi. Bul taraptan halyqty aýdan basshylyǵynyń jumysy qanaǵattandyrmaıdy.
Qanat Bozymbaev kóptiń pikirimen kelisetinin aıtyp, óz baıandamasy barysynda aýdan ákimine osy máselege basar nazar aýdarýdy tapsyrdy.
Atap ótsek, aýdanda turǵyn úı kezeginde 1160 adam tur. Ótken jyly aýdanda 8,5 myń sharshy metr turǵyn úı salynyp, paıdalanýǵa berildi. Bıyl 14 myń sharshy metr turǵyn úı salý josparlanǵan. Shonjy aýylynda jyl sońyna deıin 60 páterli turǵyn úı paıdalanýǵa beriledi. Taǵy bir kredıttik turǵyn úı salýǵa 1 mlrd. teńge bólinip, konkýrstyq rásimder bastaldy.
Aýdan ákiminiń aıtýynsha, kelesi jyly turǵyn úıler úshin 20 jer ýchaskesi bólinedi. Sonymen qatar 60 páterli úıdiń qurylysy bastalady. Bul jumystardyń jetkiliksiz ekenin aıtqan oblys basshysy 60 páterli úıdiń keminde ekeýiniń qurylysyn josparlaýdy tapsyrdy.
Shonjy aýylynyń turǵyndary birneshe úıdiń janynan joǵary vóltty elektr jelileri tartylǵanyna alańdaıdy. Bul adam densaýlyǵyna zıanyn tıgizýi múmkin deıdi olar. Qanat Bozymbaev komısıa quryp, tıisti tekserý júrgizýdi, sonyń qorytyndysy boıynsha túbegeıli sheshim qabyldaýdy mindettedi.
Ózge de saýaldar Bahar aýylynyń aýmaǵyndaǵy Jarkent-SHonjy respýblıkalyq trassasynda jaıaý júrginshi joly men jol belgisin ornatý, Shonjy aýylynda erekshe qajettiligi bar balalar úshin ońaltý ortalyǵyn ashý, ortalyq aýdandyq aýrýhanany kúrdeli jóndeý, aýǵandyq ardagerlerdi jumyspen qamtýǵa jáne úılerine jeńildikpen gaz qostyrýǵa yqpal etýge qatysty aıtyldy.