Aýyl syrtyndaǵy tóbede keshki qońyr salqynmen birneshe adam áńgime-dúken quryp otyr eken. Elge sóz bermeı, esip otyrǵan bireý beti búlk etpesten:
– Meniń ákemniń keremet baı bolǵany sonshalyq, malynyń naqty sanyn ózi de bilmeıtin edi. Tipti myńǵyrǵan jylqysyna arnap salynǵan qorasy sumdyq úlken bolatyn: senderge ótirik, maǵan shyn, sol qoranyń bir shetinen kirgen jas jabaǵy ana shetine jetem degenshe besti bıe bop, qulyndap ta úlgeretin, – dep soǵypty.
Sonda baǵanadan beri únsiz otyrǵan Qojanasyr shydamaı ketip:
– Ras aıtasyń, sózińniń bir de ótirigi joq, – depti. – Sol kezderde meniń ákem seniń ákeńniń jylqysyn baǵatyn. Ákemniń keremet uzyn quryǵy bar edi. Sonshama qyrýar jylqyny aıdap kele jatyp, úıirdi bastaıtyn aıǵyrdyń biri sál qıa bassa, qolyndaǵy quryǵymen basqa salyp jiberip, qaıyryp alatyn. Al aspan túnerip, jańbyr jaýǵaly jatsa, ákem álgi quryqpen bulttardy olaı-bylaı qozǵap, ydyratyp jiberetin de, aspan shaıdaı ashylyp shyǵa keletin.
Ózin mazaq qylyp otyrǵanyn sezgen bolýy kerek, álgi sýaıt Qojanasyrǵa kúdiktene qarap:
– Onda aıta qoıshy al, ákeń sol jer-kókke syımaıtyn uzyn quryǵyn keshke qaıda qoıýshy edi? – dep suraǵan eken, Qojekeń saspastan:
– Qaıda qoıýshy edi? Seniń ákeńniń qorasyna qoıady da! – depti.