Muhtar Áýezov atyndaǵy Qazaq ulttyq drama teatrynyń ǵımaratynda jóndeý-jańǵyrtý jumystary júrgiziletinine qaramastan, teatr óziniń 99-shy maýsymyn 16 qyrkúıekte bastaıdy, dep habarlady teatrdyń baspasóz qyzmeti.
Teatrdyń kórermenderi ónerpazdardyń qoıylymdaryn ózge teatr ǵımarattarynda tamashalaı alady. Mysaly, 16 qyrkúıekte alǵashqy qoıylym – "Qozy Kórpesh – Baıan sulý" – Almaty Theatre teatrynda ótedi.
Eske sala keteıik, 2026 jyly Muhtar Áýezov atyndaǵy Qazaq ulttyq drama teatrynyń 100 jyldyq mereıtoıy atalyp ótedi. Osyǵan baılanysty, memleket basshysy Qasym-Jomart Toqaev teatr ǵımaraty tolyqtaı qaıta jańǵyrtylatynyn málimdegen bolatyn.
"Bul jumys teatrdyń 100 jyldyq mereıtoıyna oraı 2026 jyly aıaqtalady. Alaıda, teatr ujymy bıik kórkem óner men jańa turpatty mádenıet jasaýdaǵy, otansúıgishtik, izgilik, adamgershilik pen sulýlyqty dáripteý jolyndaǵy jumysyn toqtatpaıdy," – delingen teatrdyń habarlamasynda.
Qyrkúıek aıynda Muhtar Áýezov atyndaǵy teatr kórermenderge 7 qoıylym usynbaq. Bul qoıylymdar Almaty teatrynda, Almaty oblysynyń Talǵar qalasynyń mádenıet úıinde jáne Esik qalasynyń mádenıet úıinde ótedi