«Almaty Theatre» sahnasynda Muhtar Áýezov atyndaǵy Qazaq ulttyq drama teatrynyń 99-maýsymy resmı túrde ashyldy. Ashylý qoıylymy retinde Ǵabıt Músirepovtiń «Qozy Kórpesh – Baıan sulý» spektakli kórsetildi.
Maýsymashar baspasóz máslıhatynda teatr dırektory, Qazaqstannyń eńbek sińirgen qaıratkeri Erkin Jýasbek teatr ǵımaratynyń eki jylǵa jóndeýge jabylatynyn atap ótti.
Jóndeý jumystary 2026 jyly aıaqtalmaq. Sol sebepti teatr ujymy gastróldik saparlar aıasynda Talǵar, Esik, Qaskeleń, Uzynaǵash, Qonaev qalalarynda óner kórsetýdi jalǵastyrady.
Budan bólek, bıyl Aqtóbe, Qostanaı jáne Qyrǵyzstannyń Bishkek qalasynda da spektáklder qoıý josparlanyp otyr. Jóndeý jumystary kezinde jańa qoıylymdar daıyndalmaıdy, sebebi dekorasıa men kıim tigý sehtary teatr ǵımaratynda qalǵan.
Qazaqstannyń Eńbek Eri, KSRO jáne Qazaqstannyń halyq artısi, teatrdyń kórkemdik jetekshisi Asanáli Áshimov teatr ujymyna sáttilik tilep, teatrdyń dástúrin jastardyń jalǵastyrýy kerektigin atap ótti. Sonymen qatar, saltanatty is-shara barysynda Qazaqstannyń eńbek sińirgen qaıratkeri, qoıýshy rejıser Álimbek Orazbekovtiń kitabynyń tusaýkeseri ótti.
Teatr ujymy aldaǵy eki jylda repertýaryndaǵy 70 spektákldi kórermenge kórsetýdi josparlap otyr.