Birinshi qalalyq ákeler forýmy ótti
Qala kúni qarsańynda Naýryzbaı aýdanynda ornalasqan oqýshylardyń ınovasıalyq shyǵarmashylyq ortalyǵynyń májilis zalynda Otbasy kúnine arnalǵan «Áke – asqar taý, bıik shyń» atty birinshi qalalyq ákeler forýmy ótti, dep habarlaıdy Almaty-akshamy.kz.
Forýmǵa qonaq retinde ardaqty ákeler – qalamyzdaǵy tanymal kásipkerler, bilim salasyndaǵy belsendiler, eńbek adamdary qatysty. Forým tórinde ózi otbasyndaǵy jıyrmasynshy ul sanalatyn QR Parlamenti Májilisiniń depýtaty Kenjeǵul Seıitjannyń tolqı sóılegeni talaı ákege oı tastap, serpiltkeni sózsiz. Forýmnyń moderatory Almaty qalalyq máslıhatynyń depýtaty Serik Esmatov boldy. «Ákeler odaǵy» RQB Almaty fılıalynyń jetekshisi Álıhan Musataev ta tebirene sóıledi.
«Osy forýmdy uıymdastyrýǵa sep bop otyrǵan Almaty ákimdigine, Áıelder isteri jáne otbasy demografıalyq saıasat komısıasyna alǵys aıtamyz. Myna jıynǵa qalamyzdaǵy qoǵamdyq jumystarda iskerligimen tanylǵan qyz-kelinshekterimiz tik turyp qyzmet etip jatqanyna súısindik. Ózderi demeýshilik etip, ózderi uıymdastyrdy. Osy forýmnyń basy-qasynda júrgen, ádilqazy alqasynyń hatshysy Gúlnara Qasymbekqyzyna alǵysymyz aıryqsha. Árıne, er azamattarymyzdyń syn-saıysyna baǵa berý bizge ońaıǵa soqqan joq», – dedi ádilqazy alqasynyń tóraıymy Záýresh Amanjolova.
Sonymen, jeńimpaz dep tanylǵan ákeler 5 atalymda: Tájibek Dúkenov – «Zerdeli áke», Bolathan Jákenov – «Kreatıv-áke», Sarqytbaı Rysbaev – «Shyǵarmashyl áke», Saın Ibragım – «Sportshy áke», Erbol İlıasov – «Ánshi áke» atanyp, aqshalaı jáne arnaýly júldelermen marapattaldy.