Úıdiń janynda bolǵan soń qazir jóndeý jumystary júrip jatqan Ulttyq Ǵylym akademıasynyń ǵımaraty janynan jıi ótemin. Ánsheıinde zer salyp qaraı bermeıdi ekenbiz. Keshe Shevchenko kóshesi jaǵynan zer salyp qarasam ǵımarattyń qasbetiniń mańdaıynda qazaqsha «Qazaq SSR Ǵylym akademıasy» dep, astynda oryssha «Akademıa naýk Kazahskoı SSR» degen kóne jazýy kózge uryp tur. Bul jóndeýden ótkennen sońǵy qalpy! Onyń burynǵy ataýyn qazirgi táýelsizdik kezeńine kim tyqpalap júr?
Iá, Qazaq SSR Ǵylym Akademıasy arnaıy qaýlymen 1946 jylǵy 1 maýsymda qurylǵany barshaǵa málim. Ol 1993 jyly 21 qańtarda Prezıdent Jarlyǵymen «Qazaqstan Respýblıkasynyń Ulttyq ǵylym akademıasy» bolyp qaıta qurylǵan. Iaǵnı memlekettiń táýelsizdik alýyna baılanysty mártebesi ózgertildi.
2023 jylǵy 27 naýryzda «Qazaqstan Respýblıkasy Ulttyq ǵylym akademıasynyń keıbir máseleleri týraly» Qazaqstan Respýblıkasy Prezıdentiniń №152 Jarlyǵymen «Qazaqstan Respýblıkasynyń Ulttyq ǵylym akademıasy» komersıalyq emes aksıonerlik qoǵamy Qazaqstan Respýblıkasy Prezıdentiniń janyndaǵy «Qazaqstan Respýblıkasynyń Ulttyq ǵylym akademıasy» komersıalyq emes aksıonerlik qoǵamy bolyp ózgertildi. Araǵa jarty aı salyp Úkimettiń de osyndaı qaýlysy shyqty.
2023 jyly 11 sáýirde Kúnsulý Daltonqyzy Zakarıa «Qazaq SSR Ǵylym akademıasynyń» emes, Qazaqstan Respýblıkasy Ulttyq ǵylym akademıasynyń prezıdenti laýazymyna taǵaıyndaldy.
Dál búgingi tańda bul ǵylym ordasynyń ataýy resmı qujattarda kórsetilgendeı «Qazaqstan Respýblıkasynyń Ulttyq ǵylym akademıasy»!
Al jóndeý jumysy júrgizilip jatqan ǵımarattyń mańdaıshasyndaǵy qazaqsha «Qazaq SSR Ǵylym akademıasy» dep, oryssha «Akademıa naýk Kazahskoı SSR» dep jazylǵan jazýlar saıası qate! Bul keshegi keńestik otarshyl júıeniń qaldyǵy! Sondyqtan ǵylymnyń qasıetti qara shańyraǵyndaǵy qasbet jazýy túzetilýge tıis!