Qazir elimizde qarıalarǵa qurmet kórsetý aılyǵy keńinen ótip jatyr. Osynaý parasaty mol mereke aıasynda Jetisý aýdanyndaǵy «Kemel» yqshamaýdanynyń «Mádenıet úıinde» qarıalardyń qatysýymen úlken mereke ótti. Ony aýdandaǵy «Belsendi uzaq ómir súrý ortalyǵynyń» uıymdastyrdy. «Al, kánekeı, ájeler» dep atalatyn saıysty aýdan turǵyndary men jastar da qyzyǵa tamashalady.
Sonymen atalmysh saıysqa «Belsendi uzaq ómir súrý ortalyǵynyń» turaqty qatysýshylary, ıaǵgı onyń qyzmetin alýshy qarıalar qatysty. Ájeler «Beý-aıdaı!», «Alye serdsa», «Zorkı», «Zolotye rýchkı», «Skandınavochkı» dep atalatyn bes top bolyp, ónerlerin ortaǵa saldy.
Baıqaýdyń birinshi kezeńinde ájeler ózderin jaı ǵana tanystyrmaı, birneshe til meńgergenimen de jurtty tań qyldy. Ekinshi kezeńde ájeler án salyp, monolog oqydy, aralarynan myń buralǵan bıshiler shyǵyp, tipti qyzdyryp jiberdi. Baıqaýdyń úshinshi kezeńinde ájeler bilek sybana kirisip, tamaqtyń san túrin jasady. Eń sońǵy sheshýshi saıysta, ájeler ulttyq naqyshtaǵy kıimmen shyǵyp, tańdaı qaqtyrdy. Jalpy, bul jolǵy saıysqa qatysýshylardyń osaly bolmady. Sodan da bolar kil myqtylardy anyqtaý qazylar alqasyna da ońaıǵa soqpady.
Sonymen, «Al, kánekeı, ájeler!» saıysynyń Bas júldesin
«Beý-aıdaı» ájeler toby ıelense, birinshi oryndy - «Zolotye rýchkı»,
ekinshi oryndy - «Alye serdsa», úshinshi oryndy - «Zorkı» ájeler toby laıyq dep tanyldy. Sonymen qatar, «Uıymshyl jáne belsendi» nomınasıasy «Skandınavochkı» ájeler tobyna buıyrdy. Aýdan qarıalary osynaý qarttar aılyǵy barysynda qoldaý kórsetkeni úshin «Kemel» yqshamaýdanynyń «Belsendi uzaq ómir súrý ortalyǵynyń» dırektory Gúljazıra Kanybekovaǵa, «Talant-K» medısınalyq kolej dırektory Talant Baqytbekulyna, «Sábı tilegi» qaıyrymdylyq qorynyń tóraıymy Nazym Smaǵulovaǵa, «Rýhty halyq» qaıyrymdylyq qorynyń tóraıymy Lázzat Tutqabekova zor rızashylyqtaryn bildirdi.