Qazaqstandyq medısına asa bilikti mamanynan aıyryldy.
Qazaqstannyń Densaýlyq saqtaý mınıstri Ajar Ǵınıat Almatydaǵy belgili dáriger Iýrıı Shýmkovtyń týystary men jaqyndaryna qaıǵyryp kóńil aıtty, dep habarlaıdy Almaty-akshamy.kz.
«Qazaqstannyń medısına jurtshylyǵy Almaty qalasyndaǵy gastroenterologıa ınstıtýtynda kóp jyldar boıy qyzmet atqarǵan belgili gastroenterolog - dáriger Iýrıı Petrovıch Shýmkovtyń óltirilgeni týraly habardy estip qatty alańdaýda. Jeke óz atymnan jáne densaýlyq saqtaý mınıstrligi ujymynyń atynan qaıǵyly qazaǵa ushyraǵan dárigerdiń týystary men jaqyndaryna qaıǵyryp kóńil aıtamyn. Bul oqıǵa respýblıkanyń densaýlyq saqtaý salasy úshin jantúrshigerlik asa aýyr qaıǵy bolyp otyr. Beıbit ýaqytta dárigerlerge jaýyzdyq tanytqan, óz is-áreketterine jaýap bermeıtin adamnyń qolynan qaza tapty. Otandyq medısına gastroenterologıanyń damýyna zor úles qosqan, júzdegen pasıentti joǵary medısınalyq biliminiń arqasynda emdep, ómirin saqtap qalǵan asa bilikti mamanynan aıyryldy. Úsh bala jetim qalǵan, al qart ata-anasy ulynan aıyrylǵan qaza tapqan dárigerdiń otbasy úshin qaıǵyly oqıǵanyń asa aýyr ekenin sózben jetkizý múmkin emes», – dep jazdy Ajar Ǵınıat óziniń Facebook paraqshasynda.
Ajar Ǵınıat atalǵan is boıynsha tergeý amaldarynyń jan-jaqty ótip, qaıǵyly oqıǵaǵa kinálilerdi zańnyń barlyq qatań talaby boıynsha jazalaıdy degen senim bildirdi.
«Árbir osyndaı ınsıdent búginde zańnamalyq tetikterdiń kómegimen medısına qyzmetkerleriniń quqyqtaryn senimdi qorǵaýdy qalyptastyrý, óz ómiri men densaýlyǵy úshin qoryqpaı qaýipsiz eńbek etýine kepildik beretin quqyqtyq normalardy qabyldaý qanshalyqty mańyzdy ekenin kórsetedi. Densaýlyq saqtaý mınıstrligi medısına qyzmetkerleriniń quqyqtaryn qorǵaý týraly zań jobasyn ázirledi. Jaqyn arada ol Parlamenttiń qaraýyna engiziletin bolady», – dep jazdy ol.
Esterińizge sala ketsek, Almatyda belgili gastroenterolog Iýrıı Shýmkovqa oq tıip, qaza tapqan bolatyn.