Aıýsaı shatqalynda sarqyramalarǵa aparatyn joldy tastar basyp qaldy.
Jolǵa qaraı qulaǵan tastar tosqaýyl tory men eskertý taqtalaryn buzyp ketken, dep habarlaıdy Almaty-akshamy.kz
«Osyǵan baılanysty Almaty qalasynyń tótenshe jaǵdaılar departamenti birinshi, ekinshi jáne úshinshi sarqyramalarǵa barýǵa tyıym saldy. Sondyqtan Aıýsaı sarqyramalaryna ekskýrsıalardy toqtatýǵa májbúrmiz. Aıýsaı shatqalyna keletin qonaqtardy táýekelge barmaýǵa jáne serýendeý úshin qaýipsiz marshrýttardy, mysaly, Myńkóz jolyn tańdaýǵa shaqyramyz», - dep jazylǵan Aıýsaı vızıt ortalyǵynyń áleýmettik jelidegi paraqshasynda.
Sondaı-aq, vızıt ortalyǵy shatqalǵa barý joldary ábden qaýipsiz bolǵan kezde, ol týraly mindetti túrde habarlanatynyn málimdedi.