«Aıqaı» fılmi Ońtústik Koreıada 4-13 qazan aralyǵynda ótetin áıgili Pýsan kınofestıvaliniń A Window on Asian Cinema («Azıa kınosyna tereze») baǵdarlamasynda kórsetiletin boldy.
Fılmniń rejıseri – Kenjebek Shaıqaqov. «Aıqaı» – rejıserdiń ekinshi tolyqmetrajdy jumysy jáne Ulttyq kınony qoldaý memlekettik ortalyǵynyń qoldaýymen túsirilgen alǵashqy fılmi, dep habarlaıdy Almaty-akshamy.kz Ulttyq kınony qoldaý memlekettik ortalyǵynyń baspasóz qyzmetine silteme jasap.
«Halyqaralyq kınofestıvalderde bizdiń fılmderimizge degen suranys joǵary ekenin kórip otyrmyz. Azıadaǵy eń iri kınofestıvalderdiń birinde kórsetiletin «Aıqaı» kınokartınasy – osynyń dáleli. Jalpy kınoındýstrıa ókilderi jáne bizdiń ortalyq jumysty bir júıege qoıyp, ár fılm óz maqsatyn aıqyndaýy tıis. Bizge naqty nátıjeler kerek. Bizge fılmderimizdiń sórelerde shań basyp jatqany emes, olardyń prokatqa shyǵýy, festıválderge qatysyp, jetistikterge jetýi mańyzdy», – dedi UKQMO basqarma tóraǵasy Qurmanbek Jumaǵalı.
«Aıqaı» fılmi kórermenderge eki aıaqsyz týylǵan bas keıipkerdiń ómiri arqyly ıadrolyq jarylystan zardap shekken Semeı polıgony qurbandarynyń taǵdyryn jáne anasynan aıyrylǵan balanyń ákesine janashyrlyǵyn, qamqorlyq jasaýǵa degen talpynysyn baıandaıdy.
Kórkem fılmniń túsirilimi Abaı oblysy Aıagóz aýdany Shyńǵoja aýylynda ótti. Basty rólderderde Orynbek Shaımaǵanbetov, Arnur Akram, Erbolat Álqoja, Beınur Baımuhambetov, Erlan Malaev, Aıbek Imanqulov jáne Aıǵanym Nursultan oınaıdy.
Aıta keteıik, Busan International Film Festival 1996 jyldan bastap jyl saıyn Ońtústik Koreıanyń Pýsan qalasynda ótetin Azıadaǵy eń iri kınofestıvalderdiń biri.
Ulttyq kınony qoldaý memlekettik
ortalyǵynyń baspasóz qyzmeti