Bala týý jasy 25-30 jas kezeńine aýysyp jatyr
Áıelderdiń 35 jastan keıin bala týý kórsetkishi eki esege jýyq azaıdy. Bul týraly Qazaqstandaǵy IýNFPA-nyń jynystyq jáne reprodýktıvti densaýlyq jónindegi jobasynyń úılestirýshisi Gaýhar Abýova aıtty, dep habarlaıdy Almaty-akshamy.kz QazAqparatqa silteme jasap.
«Atap aıtqanda, bala týý kórsetkishi halyq sanynyń ósýi turǵysynda jetkilikti bolyp tur. Sonymen qatar, demografıalyq esepteýler aıasynda keler 20 jylda osy kórsetkish turaqty bolýy múmkin. Degenmen, tuńǵysh balasyn áıelderdiń biraz jasqa kelgennen keıin ǵana ómirge ákelýi úrdisi baıqalyp otyr. Munymen qosa, otbasylar az bala sanymen ǵana shekteletin jaǵdaılar jıileı bastady», - dedi G. Abýova otbasy, demografıa jáne genderlik saıasat máseleleri jónindegi halyqaralyq ǵylymı konferensıa barysynda.
Onyń aıtýynsha, bul turǵyda belsendi bala týý jasy keıingi ýaqytqa ózgere bastady.
«Osy oraıda bizde belsendi bala týý jasy 25-30 jas kezeńine aýysyp jatyr. Al 35 jastan keıin biz bala týý kórsetkishiniń eki esege jýyq tómendegenin baıqap otyrmyz», - dedi G. Abýova.
Budan buryn habarlanǵandaı, 17 qarashada elordada Otbasy, demografıa jáne genderlik saıasat máseleleri jónindegi halyqaralyq ǵylymı konferensıa bastaldy.