Ǵaryshker ekinshi ret ǵaryshqa attanady.
Alaıda bul jolǵy sapary jerde ótedi. Ǵaryshker eki serigimen birge Ulttyq ǵarysh ortalyǵy aýmaǵynda ornalasqan Space Nomad tájirıbelik keshenin synaqtan ótkizedi, dep habarlaıdy Almaty-akshamy.kz 24.kz-ke silteme jasap.
Ulttyq ǵarysh ortalyǵynda ornalasqan bul keshenniń ishi ǵarysh kemesiniń ishki kórinisine ábden jaqyndatylǵan. Ǵalymdar toby osy keshenge birneshe kúnge kirip, keleshekte ǵaryshta júrgizilýi tıis zertteýler tizimin anyqtaıdy. Al alǵashqy ekıpaj eki kún boıy keshen jumysyn synaqtan ótkizbek. Keshenniń Ortalyq Azıada balamasy joq. Bir jylda turǵyzyldy. Tórt adamnyń ómir súrýine yńǵaıly etip jabdyqtalǵan. Tamaqtanýy, demalý, jumys kestesi ǵarysh jaǵdaıyna sáıkes túzilgen. Qazirgi tańda taǵy birneshe keshen salý jospary qarastyrylýda.
«Jabyq keńistikte adamnyń psıhologıalyq-fızıologıalyq jaǵdaıy tekseriledi. Bir sapar otyz kúnnen bir jylǵa deıin sozylýy múmkin. Sondaı-aq osy tıpti birneshe keshen salynady. Olardyń arasynda Marstyń, Aıdyń bederi bar keshen qurylysy josparlanýda», - deıdi joba jetekshisi Rýstam Abdrahmanov.
Jobaǵa sheteldikter erekshe yqylas tanytýda. Kásibı ǵaryshkerlermen qatar týrıser de keshenge kelip, daıyndyqtan ótýine bolady.
«Sheteldik agenttikter tarapynan halyqaralyq ekıpaj qurýǵa qyzyǵýshylyq bar. Qazirgi ýaqytta ǵalymdardan bólek týrıser qatysatyn ekıpajdar qurý nusqalary talqylanýda. Aldaǵy ýaqytta bul ekıpajdar jasaqtalady degen oıdamyn», - deıdi «Qazaqstan ǵarysh sapary» UK» AQ Basqarma tóraǵasy Aıdyn Aıymbetov.
Atalǵan keshen jas ǵalymdar úshin qýanyshty jańalyq bolary sózsiz. Iaǵnı, aeroǵarysh salasyna qyzyǵyp júrgen stýdentter men oqýshylar óz jobalaryn osy jerde júzege asyrýyna múmkindik bar.
«Space Nomad jobasy tek elimizge ǵana emes, jastarǵa da úlken kómegin tıgizedi. Mektep oqýshylary óz jobalaryn ekıpaj múshelerine usynyp, olardy is júzinde teksere alady», - deıdi jas ǵalym Erasyl Táýekel.
Aıta keteıik, kelesi sapar shilde aıyna josparlanǵan. Saparǵa ǵalymdar qatysady dep kútilýde.