QR Parlamenti Májilisiniń depýtaty Aıdos Sarym eldegi qazirgi jaǵdaı, Prezıdent málimdemesi men Úkimet otstavkaǵa ketýine qatysty pikir bildirdi, dep habarlaıdy almaty-akshamy.kz QazAqparatqa silteme jasap.
«Gaz baǵasynyń qymbattaýyna qatysty halyqtyń talaby oryndy dep oılaımyn. Jalpy, elde ekonomıkalyq sheshim qabyldar kezde, onyń áleýmettik-saıası tusyn da umytpaǵan jón. Halyq taǵdyry men múddesine qatysty zań, reforma nemese sheshim qabyldar aldynda jurtty habardar etken durys. Iaǵnı biz jospar quryp, sheshim qabyldaǵan kezde aldymen adamnyń múddesin eskerýimiz qajet. Sosyn halyq úshin iske asyp jatqany sharany artyq-kem tusyn saralap, aprobasıadan ótkizý kerek. Taǵy bir mańyzdy dúnıe - bolyp jatqan jáne bolaıyn dep jatqan jaıt týraly halyqty jan-jaqty aqparattandyrý mańyzdy», - dedi Aıdos Sarym.
Onyń aıtýynsha, endi jasaqtalatyn Úkimet joǵary aıtylǵan jaıttardy nazarǵa alǵan jón.
«Búgin Memleket basshysy qozǵaǵan taǵy bir mańyzdy másele - jeke tulǵalardyń ózin bankrot dep jarıalaı alýy. Ómirde túrli jaǵdaı bolyp jatady, adamdar qaryzǵa batyp jatady nemese nesıesin ýaqytyly tóleı almaýy múmkin. Sondaı jaǵdaıda tek zańdy tulǵalar ǵana emes, jeke tulǵalar da ózin bankrot dep tanýy - jeke máseleni sheshýdiń bir joly. Jáne bul biraz elderde bar tájirıbe. Komýnaldyq tarıfterdiń baǵasy da ýaqytyly kóterilip otyr. Sebebi onyń salmaǵy baıaǵy halyqtyń qaltasyna túsedi jáne Prezıdent 180 kúndi belgilep otyr, ıaǵnı osy ýaqyttyń ishinde jaǵdaıdy birjaqty qylý kerek. Bul - Úkimetke júkteletin mindet», - dedi ol.
Odan bólek, halyq qalaýlysy Úkimettiń otstavkaǵa ketýine qatysty óz oıyn bildirdi.
«Óz basym Premer-Mınıstr durys sheshim qabyldady dep esepteımin. Úkimet basshysynyń jaýapkershilikti óz moınyna alyp, otstavkaǵa ketýi zańdy ári azamattyq sheshim dep oılaımyn. Búginde Úkimettiń jańa quramyn jasaqtaýǵa kirisip jatyr, jýyrda fraksıa otyrysy ótedi», - dedi A. Sarym.
Sondaı-aq, Májilis depýtaty quqyq qorǵaý organdary áleýmettik jelide tarap jatqan túrli aqparattar men vıdeolarǵa saraptama júrgizý kerektigin aıtty.
«Arandatýshylyqtan aýlaq bolý kerek. Iaǵnı halyqty shatastyrýǵa jol bermeý qajet. El ishinde iritki salmaý úshin jelide tarap jatqan aqparattardy saralaǵan jón. Tek resmı derekterge súıenip, feık aqparattardan aýlaq bolǵanymyz durys», - dedi ol.