Buryn aýdandyq máslıhat, qalalyq máslıhattar partıalyq tizimmen saılanatyn bolsa, aldaǵy saılaýda olardyń barlyǵy jekelegen azamattardyń saılaýǵa túsýin qamtamasyz etedi. Iaǵnı partıalar emes, jeke tulǵalar óz aýdanynyń, óz qalasynyń máslıhatyna okrýg boıynsha saılaýǵa túsedi. Al saılaýshylar óziniń depýtatynyń kim ekenin jaqsy biletin bolady. Parlamentte birinshi oqylymda qabyldanǵan zańǵa nazar aýdarsańyz, ishinde «Imperatıvti mandat» uǵymy paıda boldy. Demek, depýtat óz saılaýshylary aldynda tikeleı jaýap beredi, saılaýshylardyń sol depýtatqa kóńili tolmasa, saılaýshylarmen aralaspaı ketse, ony qaıta shaqyrý múmkindigi zańda qarastyrylǵan.

Sonymen birge oblystar men úsh megapolıstiń máslıhattary Májilis sıaqty aralas jolmen saılanady. Olardyń belgili bir bóligi partıalyq tizimmen saılanady, osyǵan qarap oblys halqynyń qandaı partıalardy qalaıtynyn túsinýge bolady.

Saıası partıalarǵa tirkelmegen, halyqtyń arasynan shyqqan azamattar da bılik isine aralasýǵa múmkindik alady. Sondyqtan bıyl oblys jáne megapolıs ákimderinen basqa ákimderdiń 99 paıyzy saılanady. Bul bılikti halyqqa jaqyndatady, jergilikti bıliktiń, jalpy ózin-ózi basqarý júıesiniń bolmysy men tabıǵatyn ózgertedi. Keı oblys nemese megapolıs ákimderi qazirgideı «jergilikti qudaı» bolmaıdy. Onyń astyndaǵy búkil bılik tarmaǵy saılanǵan, ıaǵnı saılaýshylardyń úmitin, oıyn, baǵdarlamasyn iske asyrýshy bolady. Iaǵnı, oblys ákiminiń nemese megapolıs ákiminiń fýnksıonaly ózgeredi, ol negizinen Prezıdenttiń nemese Úkimettiń jergilikti jerdegi ókili, respýblıkalyq zańnamany iske asyrýshy, qadaǵalaýshy jáne respýblıkalyq búdjetten keletin sýbsıdıalardy, baǵdarlamalardy oryndaýshy, sony úılestirýshi bolady.

Jer máselesin alyp qarasaq, kóptegen jaǵdaıda jergilikti jerlerdi jekeshelendirýge kómekteskender – aýdan ákimderi. Al aýyl ákimderiniń shabyndyq jerlerdiń kartasyn jasaýǵa, ıgerlimeı jatqan jerlerdi qaıtarýǵa qulqy joq. Óıtkeni eshkim basshysymen taıtalasqa túskisi kelmeıdi. Sondyqtan saıasattanýshy elge ákim men búdjetti qadaǵalaıtyn, memlekettik baǵdarlamalardy iske asryrýdy talap etetin, kúshti, yqpaldy máslıhattar qajet.