Mádenıet jáne aqparat mınıstri Aıda Balaeva elimizde kásipker retinde qyzmet etip júrgen blogerlerge úndeý jasady. Bul týraly mınıstr áleýmettik jelide vıdeoúndeý jarıalady.
Aıda Balaevanyń aıtýynsha, osy jyldyń 10 shildesinde elimizde qaýipsiz onlaın ortany qurýǵa baǵyttalǵan «Onlaın platformalar jáne onlaın jarnama týraly» zańǵa qol qoıyldy. Atalǵan zańdaǵy negizgi quqyqtyq tetikterdiń biri - jelidegi jarnamany tańbalaý mindeti.
Álemniń jetekshi elderi onlaın jarnamanyń mańyzdy róli jáne ony mnternette taratýǵa erekshe mán beredi. Mysaly, Fransıa, Belgıa, Ulybrıtanıa jáne Italıa sekildi birqatar elde blogerler qyzmeti quqyqtyq aktilermen retteledi. Bul erejeler áleýmettik jelidegi marketıńtiń artynda ashyqtyq men adal básekelestikti qamtamasyz etedi. Al Qazaqstanda komersıalyq materıaldarǵa jarnama degen belgi qoıý negizgi talaptardyń biri. Aýdıtorıa taratylyp otyrǵan aqparattyń aqyly jazylǵanyn bilýi tıis.Sonymen qatar tamyzda biz onlaın jarnamany tańbalaý erejelerin jarıaladyq. Onda jarnamalyq materıaldarǵa arnaı belgi qoıý mindetteri bar. Soǵan sáıkes aqyly materıaldar memlekettik nemese orys tilinde usynylatyn nusqalardyń birimen belgilenýi qajet.
Mysaly, jarnama-reklama, jarnamalyq materıal – reklamnyı materıal, seriktestik materıal- partnerskıı materıal, demeýshlik materıal- sponsorskıı materıal, jarnama quqyǵynda – na pravah reklamy, demeýshimen tólengen – oplachen sponsorom, PR quqyǵynda - na pravah PR degen belgileri bolýy qajet. Internettegi jarnamany tańbalaý álemdik tájirıbe úshin ǵana qolǵa alynǵan joq. Bul áleýmettik jelidegi naryqtyq qatynastar mádenıetin qalyptastyrý úshin qajet.
Mınıstr bul zań blogerlerge kásipkerlik kodekske sáıkes aqyly qyzmet kórsetý mindetterin júkteıtinin eskertti.
«Iaǵnı, olar kásipker retinde tirkelip, salyq tóleýi tıis. Búgingi tańda quziretti organdar marketıńtik qyzmet kórsetetin blogerlerdiń statýsyn anyqtaýmen aınalysýda. Osy kásip túrimen paıda taýyp júrgen azamattar tıisti mekemelerge tirkelmegen jaǵdaıda zańsyz kásipkerlik qyzmeti úshin jaýapkershilik bar ekenin eske salamyn. Birinshi kezeńde Memlekettik kirister komıteti iri blogerlerge táýelsiz monıtorıń júrgizip, onyń negizinde baqylaý júrgizdi. Aldaǵy ýaqytta bizdiń vedomstvo men salyq organy arasynda birlesken jumys uıymdastyrylady. Sonymen birge blogerler ózderiniń jarnama berýshilerine muqıat bolýy qajet. Óıtkeni, áleýmettik jelidegi ár aqparat úshin jarnama jasaýshy tolyq jaýapkershilikte bolady. Máselen, sońǵy kezderi qarjylyq pıramıdalardy nasıhattaǵany úshin jaýapkershilik aıtarlyqtaı kúsheıdi. Endi qylmystyq kodekske sáıkes qarjylyq pıramıdalarǵa jarnama jasaǵandarǵa 2 myń AEK aıyppul, 600 saǵatqa deıin qoǵamdyq jumystarǵa jegý nemese 2 jylǵa deıin bas bostandyǵynan aıyrý jazasyna kesiledi. Qylmystyń aýyrlyǵyna qaraı múlki tárkilenip, 3 jyldan 7 jylǵa deıin bas bostandyǵynan aıyrý qarastyrylǵan», - dedi ol.
Sonymen qatar Aıda Balaeva elimizde tekserilmegen aqparatty taratqan áleýmettik jeli qoldanýshysyna da jaýapkershilik qarastyrylǵanyn aıtty.
«Quqyqbuzýshylyqtyń aýyrlyǵyna qaraı áleýmettik jeli qoldanýshylary ákimshilik jaýapkershilikke tartylady. Eger quqyqbuzýshylyq bir jyl ishinde qaıtalansa, 10 táýlikke qamaýǵa alynady nemese qylmystyq jaýapkershilikke tartylady. Biz jalǵan aqparatty anyqtaý úshin táýlik boıy monıtorıń júrgizemiz. Bárimiz quqyqtyq memlekette ómir súrip jatqanymyzdy, qylmystyq jáne azamattyq kodeksti saqtaý kerektigin umytpaýymyz kerek», - deıdi mınıstr.