Aıbek Smadıarov jańa laýazymǵa taǵaıyndaldy, - dep habarlaıdy Aqshamnews.kz tilshisi. Bul týraly búgin, 15 jeltoqsanda Aqordanyń baspasóz qyzmeti jazdy
«Memleket basshysynyń ókimimen Aıbek Serikbaıuly Smadıarov Qazaqstan Respýblıkasy Prezıdenti Ákimshiliginiń İshki saıasat bóliminiń meńgerýshisi laýazymyna taǵaıyndaldy»,- delingen habarlamada.
Aıta keteıik, buǵan deıin ol Syrtqy ister mınıstrliginiń resmı ókili qyzmetin atqarǵan edi.
9 jeltoqsanda Smadıarov jýrnalıserge qyzmetinen ketetinin jetkizgen bolatyn. Aıtýynsha, ol bul kúnge aldyn ala daıyndalǵan jáne sheshimdi aıaqasty qabyldamaǵan.
«Men bul kúnge arnaıy daıyndaldym. Bul – meniń jeke sheshimim. Osy minberde turǵanyma segiz jyl bolypty. Osy ýaqyt aralyǵynda elimizdiń syrtqy saıasaty talaı belesterden ótti, túrli suraqtar týyndady. Tek sizderdiń, jýrnalıserdiń arqasynda búkil álem Qazaqstan týraly bildi. Sizder mınıstrlikke orasan zor qoldaý kórsettińizder», – degen edi ol.