Almatyda ıspandyq sýretshiniń «Aı sáýlesi» atty aıryqsha kórmesi ashyldy
Almaty tórinde ıspan sýretshisi Hose Marıa Kanonyń «Aı sáýlesi» (Moon shine) atty jeke kórmesi ashyldy. Ábilhan Qasteev atyndaǵy QR Memlekettik óner mýzeıinde ashylǵan Kanonyń kórmesi Ispanıa Koróldiginiń Qazaqstan Respýblıkasyndaǵy Elshiliginiń qoldaýymen uıymdastyryldy, dep habarlaıdy almaty-akshamy.kz El.kz aqparat agenttigine silteme jasap.
Sonymen qatar, ári ánshi, ári sýretshi Hose Marıa Kanonyń bul kórmesi Orta Azıa elderinde onyń ishinde Qazaqstanda tuńǵysh ret kórermen nazaryna usynylyp otyr. Al sýretshi Ispanıa, jalpy, Eýropa, Reseı, Qytaı, Vetnam men Latyn Amerıkasyndaǵy elderde óte tanymal. Bul jóninde Ispanıa Koróldiginiń Qazaqstan Respýblıkasyndaǵy Elshisi Horhe Ýrbıola Lopes de Montenegro bylaı dedi:
«Qazaqstanda Hose Marıa Kanonyń sýret kórmesin uıymdastyrý ıdeıasy byltyr osy Ábilhan Qasteev atyndaǵy óner mýzeıine kelgenimde týdy. Dıplomatıa degen tek saıasat qana emes, ónermen de baılanysty dep oılaımyn. Sondyqtan da qazaqstandyqtardy ıspan halqy ókiliniń ónerimen tanystyrýdy durys dep sheshtim».
1959 jyly Madrıdte dúnıege kelgen bolashaq sýretshi 10 jasynan bastap sáýlet ınstıtýtyna túsýge daıyndalý úshin, Rafael Idalgo de Kavedes akademıasyna, odan keıin «Artaquio» akademıasyna barady. Kano sáýlet ınstıtýtynyń birinshi kýrsynda oqyp júrip enkaýstıka, ıaǵnı «órtep salý ónerin» sondaǵy sýretshi profesordan úırenedi.
Búgingi kórmege qoıylǵan 19 kartınanyń barlyǵy - osy tásilde daıyndalǵan týyndylar. Sýretshiniń palıtrasyna kiretin negizgi baılanystyrýshy komponent – balaýyz. Mármár nemese basqa taqtaǵa jaǵylǵan boıaýlar qaıtadan eritilip, materıalǵa «kúıdirilgen» balaýyz boıaýlarymen keskindeý ádisi ejelgi Mysyrda belgili bolǵan.
Mysyrlyq qolónershilerdiń balaýyzdy qoldanýy tájirıbelik oılardan týyndaǵan bolýy múmkin. Qabirler men mýmıalardy boıaý úshin berik, ýaqyt boıynsha ózgermeıtin materıaldar qajet boldy. Balaýyz, boıaýǵa qosylǵan shaıyr sıaqty, osy maqsat úshin óte qolaıly boldy. Jazbasha derekkózder enkaýstıka tehnıkasy týraly barlyq qupıalardy bermeıtinine qaramastan, keıingi urpaqtardyń oǵan degen qyzyǵýshylyǵy tómendemeıdi. Hose Kanonyń enkaýstıkalyq qupıasy bar sıaqty, sondyqtan ol balqytylǵan boıaýlarmen taqtalarǵa emes, kenepke jazady.
«Negizi bul sýretshiniń shyǵarmashylyǵy bes túrli kezeńge bólinedi. Ár kezeńde shamamen 20 jumystan bolsa, jalpy alǵanda 100-den astam jumysy bar desek bolady. Kanonyń bir týyndysynyń quny, eger men qatelespesem, Hospıs aýksıonynda 4000$ satylǵan bolatyn» - deıdi, Elshi myrza.
2002 jyldan kásibı túrde jumys isteı bastaǵan Kano bul kórmesindegi týyndylarynda túngi shyraqtyń jumbaq jaryǵyn beıneleýge tyrysqandaı. Romantıkalyq-ańyzǵa aınalǵan Aı taqyryby árqashan Hose Kanony qyzyqtyryp keledi. Ol «Mekano» pop-tobynda ánshi bolǵan kezinde óziniń eń tanymal áni - «Aı balasy» balladasyn túngi jaryqqa arnady. Keıinirek Kano Londonda qoıylǵan «Aı» operasyn jazdy, ol operanyń premerasynda Plasıdo Domıngo basty partıany shyrqaǵan eken.
Aıta keteıik, Kanonyń bul kórmesi Almatyda 5 naýryzǵa deıin bolyp, sodan keıin Astana jurtshylyǵyna tanystyrylatyn bolady.
