Energetıka mınıstrligi AI-92 jáne AI-95 markaly avtobenzınder boıynsha qazirgi ahýaldy baıandady, dep habarlaıdy Almaty-akshamy.kz.
Qazir Atyraý, Pavlodar jáne Shymkent munaı óńdeý zaýyttary qalypty rejımde jumys istep tur jáne AI-92, AI-95 benzınderin, ótinim bolǵan kezde AI-98 benzınderin óndirýde.
«Munaı bazalaryndaǵy, joldaǵy, óńdeý zaýyttaryndaǵy jáne AI-95 «premıaldy» avtobenzıniniń ımportyndaǵy kólemderiniń jıyntyq qory 36,5 myń tonnany (eldiń 12 kúndik qajettiligi) jáne AI-92 – 257,1 myń tonnany (18 kún) quraıdy. Aıta keteıik, bir lıtr AI-92 avtobenzıniniń shekti baǵasy memlekettik baǵa retteýge baılanysty 205 teńgeden aspaýy tıis», - dep jazylǵan mınıstrlik saıtynda.
Al AI-95 baǵasyn memleket rettemeıdi, sondyqtan janarmaı quıý stansıasynyń «pıstoletinen» shyǵatyn baǵa naryqtaǵy suranys pen usynysqa baılanysty ózgerýi múmkin.
28 shildedegi jaǵdaı boıynsha Pavlodar oblysynyń munaı bazalarynda jáne jolda AI-95-tiń 8 táýlikke jetetin 0,8 myń tonnasy, AI-92-niń 9 táýlikke jetetin 4,1 myń tonna qory bar.
«Josparly-aldyn alý jóndeý jumystary aıaqtalyp, Pavlodar MÓZ iske qosylýyn eskere otyryp, avtobenzınderdi jetkizý kólemi birtindep ulǵaıatyn bolady», - deıdi Energetıka mınıstrligi.